I varfër në Shqipëri, me pamundësinë më të madhe në BE për të siguruar ushqim të mjaftueshëm

Në vitin 2022, rreth 8.3 për qind e popullsisë së BE-së, nuk ishin në gjendje të përballonin një vakt, që përmbante mish, peshk ose ekuivalent vegjetarian një herë në dy ditë, një pikë përqindje (pp) më e lartë, krahasuar me vitin 2021 (7.3%).

Ndërkohë që 19.7 për qind e njerëzve në rrezik varfërie nuk ishin në gjendje një vakt të tillë.

Për Shqipërinë, të dhënat i përkasin vitit 2021, por ato janë ndër më të lartat në Europë, duke reflektuar pamundësinë për të blerë dhe përgatitur ushqimin e duhur.

Sipas Eurostat, 67.9 për qind e njerëzve në rrezik varfërie në Shqipëri, në vitin 2021 nuk ishin në gjendje të përballonin një vakt, që përmbante mish, peshk ose ekuivalent vegjetarian një herë në dy ditë, mëse tre herë më e lartë sesa mesatarja europiane.

Kjo shifër është më e larta në Europë, ndërsa nuk raportohen të dhënat për Kosovë. Pas nesh vjen Turqia, me 62.9 për qind, Maqedonia e veriut 54.8 për qind, Bullgaria 44.9 për qind, Serbia 37 për qind.

Jo vetëm të varfrit e kanë të pamundur të sigurojë një vakt të mjaftueshëm. 34.3 për qind e popullsisë shqiptare nuk ishin në gjendje të përballonin një vakt, që përmbante mish, peshk ose ekuivalent vegjetarian një herë në dy ditë (nga 8.3% që është mesatarja europiane). Në këtë tregues, Shqipëria renditet e treta më e lartë në Europë pas Turqisë 37.3 për qind dhe Maqedonisë së Veriut 36.5 për qind.

Pamundësia për të siguruar ushqim të mjaftueshëm është e lidhur kryesisht me nivelin e ulët të të ardhurave dhe çmimet relativisht të shtrenjta. Ndonëse kanë pagat më të ulëta mesatare në rajon, rreth 30-40 për qind më pak se vendet e tjera (me përjashtim të Kosovës) familjet dhe individët shqiptarë përballen me çmime më të larta në blerjet e tyre të përditshme.

Në Shqipëri, çmimet ishin sa 61.3 për qind e mesatares së Bashkimit Europian, sipas të dhënave të raportuara nga INSTAT. Ndërsa në raport me shtetet e tjera të rajonit, Shqipëria është e dyta relativisht më e shtrenjtë, pas Serbisë, që ka një tregues prej 62.8 për qind. Në Malin e Zi, çmimet janë sa 60.4 për qind e mesatares së Bashkimit Europian, në Bosnje Hercegovinë 57.6 për qind, ndërsa më e lira në rajon është Maqedonia e Veriut, me 51 për qind.

Më të shtrenjta se mesatarja europiane në Shqipëri janë bulmeti 111.7 për qind, vaji 106.7 për qind, Pijet joalkolike 108 për qind, elektroshtëpiake 122 për qind, sipas Eurostat. Më i lirë është duhani me 44 për qind.

Për të ardhurat për frymë, Shqipëria renditet e fundit në Europë, me 34 për qind të mesatares europiane.

Europa

Sipas Eurostat, në vitin 2022, diferenca midis popullsisë totale dhe të rrezikuar nga varfëria, për sa i përket kapacitetit për të përballuar ushqimin e duhur, ishte gjithashtu i dukshëm në të gjithë vendet e BE-së: përqindja më e lartë e njerëzve në rrezik të varfërisë, të paaftë për të përballuar ushqimin e duhur, u regjistrua në Bullgari 44.6 për qind, e ndjekur nga Rumania 43.0 për qind, dhe Sllovakia 40.5 për qind.

Nga ana tjetër, përqindja më e ulët, u regjistrua në Irlandë 5.0 për qind, e ndjekur nga Luksemburgu 5.1 për qind dhe Qipro 5.6 për qind./Monitor/