I vendosi pikat mbi “i”, Donika Gërvalla foli për ata që nuk e votuan, dhe, akuzat për Gjykatën Speciale
Ministrja në detyrë e Punëve të Jashtme, Donika Gërvalla, sot prezantoi Hekuran Muratit si kandidat për Kryetar të Parlamentit, dhe pas dështimit edhe të këtij propozimi nga Lëvizja Vetëvendosje ajo tha se kjo tregon që bllokimi s’lidhet me emra, por me mosgatishmërinë e opozitës për të shkuar në fazë të re.
Me këtë rast, ajo sqaroi edhe dy momente pasi nuk u votua dje si kandidate duke treguar dhe një absurditet që po ndodhë në radhët e Lidhjes Demokratike të Kosovës ku djali i Xhemajl Mustafës, nipi i Tahir Zemajt dhe dy komandantë të Koshares nuk e votuan vajzën e Jusuf Gërvall por u u bënë bashkë me PDK-në dhe Listën Srpska.
“Selimi merr vendimet e saj. S’ka marrë pjesë në votim për dallim nga disa të tjerë që nuk është pritur që mund të bashkohen me Listën Serbe dhe PDK-në për të votuar kundër personit tim. S’kam arsye e asnjë të drejtë ta komentoj vendimin e Shqipe Selimit.
Djali i Xhemajl Mustafës – Besian Mustafa, nipi i Tahir Zemajt – Armend Zemaj, dy komandantë të Koshares dhe këta u bënë bashkë me PDK-në e Listën Serbe për të votuar kundër. Nuk ka person në skenën publike të Kosovës që më hapur dhe me kosto të lartë politike, është angazhuar më shumë për zbardhjen e krimeve të pasluftës,” tha Donika Gërvalla ndërsa mohoi se ka qenë dëshmitare në Gjykatën Speciale ndaj ish-krerëve të UÇK-së.
Dhe, prej sot, kur akuza ka përfunduar me dëshmitarët dhe u konfirmua se ajo nuk figuronte, Donika Gërvalla u zotua se të gjithë ata që do ta akuzojnë se ka dëshmuar pranë Gjykatës Speciale kundër ish-krerëve të UÇK-së, do të përballet me ligjin.
Ndryshe, në seancën e 20 Gushtit, Donika Gërvalla u propozua nga Lëvizja Vetëvendosje për Kryetare të Parlamentit dhe mori mbështetjen e vetëm 56 deputetëve. Ndër deputetët që nuk e mbështetën ishte dhe një nga radhët e LVV, Shqipe Selimi, bashkëshortja e Ish-Kryetarit të Grupit Parlamentar të Lëvizjes Vetëvendosje, Rexhep Selimi, e cila këtë vendim e arsyetoi me akuzat e Gërvallës vite më parë ndaj bashkëshortit të saj përmes rrjetit social Facebook.
