I vihet zjarri një shtëpie të ndërtuar nga Qeveria në veri të Kosovës

Ministri i Administrimit të Pushtetit Lokal, Elbert Krasniqi, ka njoftuar se një shtëpie të ndërtuar nga Qeveria në veri të Kosovës, i është vënë zjarri.

“Rreth orës 00:30 gjatë mesnatës një patrollë policore ka identifikuar tym në një nga shtëpitë e ndërtuara nga Qeveria në Kodrën e Minatorëve. Zjarri është fikur dhe dëmet janë sanuar. Fatmirësisht, nuk ka asnjë person të lënduar veç dameve materiale. Kjo nuk është hera e parë që ka sulme të tilla, mirëpo kjo nuk është as hera e fundit që do të ndërtohen shtëpi të reja,” ishte i qartë Elbert Krasniqi në reagimin e tij përmes rrjetit social Facebook.

Qeveria e Republikës së Kosovës, tha ai, denon fuqishëm këtë akt dhe as ky e asnjë sulm tjetër nuk e ndal kthimin e banorëve në pronat e tyre.

“Kërcënimet, shantazhet, pamfletat terroriste, nuk i friksojnë qytetarët dhe as nuk e ndalojnë punën tonë për sigurimin e banimit të qendrueshëm,” tha Ministri i Administrimit të Pushtetit Lokal i Kosovës, Elbert Krasniqi duke përfunduar:

“Ky sulm është nxitje e mosdurushmërisë etnike e cila nxitet nga Vuçiçi i cili ka mbetur i mbyllur në propagandën e tij dhe e ka humbur kontrollin e strukturave paralele në pjesën veriore.”

Ndryshe, pas rikthimit të institucioneve të Kosovës në Veri, Presidenti i Serbisë, Aleksandar Vuçiç, iu drejtua kombit duke i premtuar serbëve të Kosovës mbështetje financiare nga shteti serb ndërsa i lëshoi ultimatum Perëndimit me kërkesën kapitale që në veri të kthehet “status quo ante”, periudhë kur në veri të Kosovës mbretëronte paligjshmëria e menxhuar nga bandat serbe të Vuçiçit.