I vjetër në politikë!
nga Edi Paloka*
Mos vazhdoni më kot me këto tezat e “të vjetërve” dhe të rinjve në politikë. Politika nuk është sport që “të vjetrit” nuk e bëjnë dot dhe duhet t’ju lëshojnë vendin më të rinjve, përkundrazi! Në politikë nuk ka rëndësi se sa vite kalendarike ke kaluar, po se si je sjellë në ato vite.
Nuk të konsumojnë vitet në politikë, të konsumon abuzimi me pushtetin, korrupsioni, arroganca, imoraliteti politik…!
Vitet në politikë përkundrazi, janë eksperiencë, janë përvojë, që po të përdoret me pozitivitet, vetëm mirë bëjnë për qytetarët.
A e dini ju se sa vjeç është Presidenti aktual i vendit më të fuqishëm të botes? A e dini që është në politikë që nga vitet ‘70…?
Sigurisht klasa politike do rinovuar e kjo nuk ka diskutim , po edhe në politikë, si në çdo fushë ka seleksionim dhe e vetmja mënyrë për ta bërë këtë seleksionim është vota.
Ata që preferojnë katapultimin justifikohen duke thënë se nuk të lënë “ujqërit e vjetër” të ecësh në politikë as me votë.
Nga 1994 kur jam zgjedhur për herë të parë në Këshillin Kombëtar e në vazhdim nga 1999 kur u zgjodha për herë të parë në kryesi, unë kam kandiduar mes “elefantëve” të PD, personalitete që vërtetë mund të të “shtypnin” me peshën e tyre në atë kohë, ndërkohë që unë isha vetëm anëtar i thjeshtë i PD dhe gazetar i “RD”. Po, në atë kohë votohej e numëroheshin votat. Votoheshin të gjithë nga Kuvendi, pavarësisht postit që mbanin. Votohej Berisha, votohej Meksi që ishte kryeministër, votohej Pjetër Arbnori që ishte kryetar Kuvendi , votoheshin ministra e deputetë bashkë me të tjerët e në Këshill Kombëtar apo Kryesi hynte ai që votohej nga delegatët pavarësisht postit apo afrimitetit me “të mëdhenjtë”.
Edhe kur u zgjodha deputet për herë të pare, ishte një përplasje kokë më kokë, në maxhoritar me një ministër socialist nga më të fuqishmit. Kanë qenë nga zgjedhjet më të veshtira të zhvilluara ndonjëherë në Shqipëri, ato të vitit 2001 dhe zona ishte nga më të vështirat për PD në atë kohë…
Nuk i shkruajta këto rreshta për të mburrur veten, po për t’ju kujtuar disave që “kontaktin” e parë me PD e krijuan në të njëjtën kohë që të ndenjurat e tyre krijuan kontakt me karriget e pushtetit, se ne “të vjetrit”, nuk jemi rastësisht këtu e as nuk na ka katapultuar kush. Nuk kemi hyrë në politikë në momentin që na është ofruar ndonjë karrige po kemi një jetë që sakrifikojmë. Jemi “të vjetër“, po, se e kemi themeluar PD. Jemi ngritur kundër diktaturës më të egër, atëherë kur shumica edhe të ngrinin kokën e të shihnin drejt kishin frikë.
E kemi filluar si anëtar të thjeshtë e si komisionerë nëpër qendra votimi. Jemi përleshur e përgjakur nëpër protesta. Kemi provuar dhe birucat e burgjet. Kemi humbur e fituar beteja politike, disa pa përfituar asnjëherë “privilegje”.
Pra , me pak fjalë; nuk është “turp” të jesh i vjetër në politikë, përkundrazi . Po në politikë duhet të të mbaje e të të rrisë besnikëria, luajaliteti dhe përkushtimi ndaj atyre që përfaqëson e që të zgjedhin, jo poshtërsitë e kulisat ndaj atyre që nuk i mund dot ndershmërisht! Vota e lirë është ajo që përcakton!
*Deputet i PD
