I zhgënjyer me BE, Palmer: Të çelen negociata me Shqipërinë dhe të hiqen vizat për Kosovën!
Zv/Ndihmëssekretari amerikan i Shtetit, Matthew Palmer, është shprehur i zhgënjyer pse Maqedonia e Veriut dhe Shqipëria nuk arritën të çelin negociatat e anëtarësimit me Bashkimin Evropian, gjë që, sipas tij, mund të ketë rritur skepticizmin, por edhe mund të minojë rolin e SHBA dhe Evropës në sigurinë dhe integrimin e rajonit.
“Ne jemi të zhgënjyer që çështja e hapjes së konferencave të para ndërqeveritare për Maqedoninë e Veriut dhe Shqipërinë nuk është zgjidhur, pavarësisht angazhimit të fortë dhe zgjidhjeve të arsyeshme të presidencës portugeze dhe partnerëve të fortë evropianë. Nëse SHBA-ja dhe BE-ja nuk tregojnë përkushtim ndaj rajonit, kjo çon në rritjen e skepticizmit në vetë rajonin dhe mundësinë që konkurrentët gjeopolitikë të minojnë në mënyrë agresive kredibilitetin e SHBA-së dhe BE-së dhe vetë rajoni të dyshojë në përcaktimin për integrimin evropian,” tha diplomati amerikan në konferencën ndërkombëtare “Prespa Forum” që po zhvillohet në Ohër ndërsa foli dhe për çështjen e liberalizimit të viziave për Kosovën, premtim ky që, sipas tij, duhej të mbahej nga ana e Bashkimit Evropian.
“Është jetike që BE-ja të mbështesë rajonin dhe të miratojë liberalizimin e vizave për Kosovën. Jemi të zhgënjyer nga vendimi për të mos nisur negociatat, sepse këto shtyrje kanë penguar përparimin e synimeve tona në rajon, jo vetëm normalizimin e marrëdhënieve mes Kosovës dhe Serbisë, por më shumë se kaq”, ka deklaruar Palmer, duke theksuar se “për të realizuar potencialin e plotë të këtij rajoni, liderët duhet të bëjnë më tepër se premtime, “duhet të marrin masa dhe të zgjidhin çështjet politike brenda dhe jashtë vendit, të fuqizojnë demokracitë multietnike dhe sistemet e drejtësisë dhe të lëvizin drejt së ardhmes”.
Udhëheqësit në rajon duhet të marrin një qëndrim të vendosur për të ardhmen e tyre evropiane, tha Palmer, dhe Shtetet e Bashkuara besojnë se përpjekjet e rajonit për të krijuar një treg të përbashkët rajonal, janë hapa normalë në rrugën drejt anëtarësimit në BE ndërsa shtoi:
“Vizioni i Shteteve të Bashkuara në rajon ka qenë dhe do të mbetet i përqendruar në paqe me veten dhe fqinjët e tij, për një rajon që është i qëndrueshëm, i begatë dhe i integruar në kornizën euro-atlantike.”
Në fund, Zv/Ndihmëssekretari amerikan i Shtetit, Matthew Palmer, theksoi edhe nevojën për reforma në ekonomi dhe luftimin e korrupsionit e krimit të organizuar.
“Përveç ekonomisë, qytetarët në rajon janë më të shqetësuar për korrupsionin. Lufta kundër korrupsionit paraqet bazë për ruajtjen dhe forcimin e demokracisë.”
Ministri i Punëve të Jashtme i Maqedonisë së Veriut, Bujar Osmani, na fjalimin e tij tha se integrimi evropian mbetet qëllimi kryesor i vendeve të rajonit, ndërsa edhe një herë e vlerësoi si të mirë propozimin e presidencës së deritanishme të BE-së, Portugalisë, për zgjidhjen e kontestit me Bullgarinë, që pamundësoi hapjen e negociatave me BE-në.
Ndryshe, në Konferencën dyditore ndërkombëtare “Prespa Forum” që po zhvillohet në Ohër po marrin pjesë përfaqësues të lartë shtetërorë nga Ballkani, Bashkimi Evropian dhe SHBA, ndërsa tema e konferencës është “Ballkani Perëndimor: pjesa që i mungon Evropës që të jetë e plotë”. /RFE/
