Ibrahimaj: Nga 1 prilli, paga minimale 40 mijë lekë!

Duke filluar nga 1 Prilli paga minimale në Shqipëri do të rritet në 40 mijë lekë, bëri me dije sot ministrja e Financave dhe Ekonomisë, Delina Ibrahimaj.

Vendimi është miratuar sot në mbledhjen e Këshillit të Ministrave.

“Në mbledhjen e Këshillit të Ministrave u mor sot vendimi për përcaktimin e pagës minimale, e cili shkon nga 34 mijë lekë në 40 mijë lekë. Për 9 mujorin 2022 pagat mesatare në sektorin privat janë rritur me 12.3 për qind. Rritja që sot u miratua është prej 6 mijë lekësh bruto, dhe është në nivel prej 17.6 për qind më e lartë se sa paga që aktualisht është në treg.

Kjo pagë i atribuohet si sektorit privat edhe atij publik. Çdo punëmarrës dhe punëdhënës është i detyruar të zbatojë vendimin e pagës minimale që nga data 1 prill. Që do të thotë që në pagën që punonjësit do të marrin më muajin maj do të jetë e reflektuar rritja”.

Ministrja tha se qeveria ka miratuar edhe një vendim tjetër i cili do të shkojë në ndihmë të sektorit të bujqësisë, pyjeve dhe peshkimit, dhe të sektorit të industrisë përpunuese, ku do të subvencionohet elementi i rritjes së kostos shtesë të kontributeve të sigurimeve shoqërore për çdo punonjës me pagë minimale, që janë në listëpagesën e muajit dhjetor.

“Kjo ndihmë vjen në suport të atyre bizneseve që kanë një numër të lartë punonjësish. Numri i përafërt që përfitojnë nga kjo masë është rreth 30 mijë persona. Kjo mbështetje do të jepet të gjithë subjekteve për të mbështetur koston shtesë gjatë gjithë vitit 2023. Është një politikë që do të ndiqet në vijimësi nga qeveria shqiptare edhe për vitet në vijim, për të gjitha rritjet të pagës minimale të cilat do të jenë më të larta se sa rritjet normale që kanë qenë të zbatuara vitet e kaluara.

Ne synojmë që në vitet e ardhshme paga mesatare në vend të arrijë në nivelet e vendeve të rajonit dhe të bëhet konkurruese. Kemi qenë të kujdesshëm pasi nuk duam që t’i shtojmë kosto biznesit dhe kjo është arsyeja që subvencionojmë koston shtesë për kontributet e sigurimeve shoqërore. Kjo nuk lidhet me politika zgjedhore”.

Paga minimale u rrit për herë të fundit më shtator të vitit të kaluar, në nivelin e 34 mijë lekëve. Sipas INSTAT deri në tremujorin e tretë 2022, 16% e të punësuarve në vend paguhen deri në pagë minimale, dhe 27% të tjerë kanë pagë deri në 40 mijë lekë.

Të gjithë ushtarakët në vend do të marrin një rritje page prej 7 për qind, vendim që hyn në fuqi nga 1 Marsi.

“Qeveria ka vendosur rritje të pagës prej 7%, hyn në fuqi menjëherë nga data 1 mars për të gjithë ushtarakët. Nga ushtaraku bazë deri në gradat më të larta. Çdo vit do të kemi rritje pagash deri sa ushtarakët tanë të keni një pagë mesataren të vendeve aleate të NATO-s. 55 mijë lekë është pagesa fillestare dhe plot 10 mijë lekë të reja që është trajtimi ushqimor. Nëse e krahasojmë pagën e sotme me atë të vitit të kaluar sot është 40% më e lartë. Kjo është  një arsye më tepër që të rinjtë të bëhen pjesë e Forcave të Armatosura”, tha ministri i Mbrojtjes Niko Peleshi./Monitor/