Ibsen Elezi dhe Safet Gjici, kafe së bashku në Kukës…  

Ibsen Elezi, ish-kryetar i degës së PD-së në Kukës, tërhoqi vëmendjen mediatike me fjalimin e tij në Kuvendin Kombëtar të PD-së, rreth një javë më parë, ndërsa nuk kurseu kritikat ndaj kreut demokrat Lulzim Basha dhe drejtuesve të tjerë të kësaj force politike.

Elezi akuzoi madje deputetët e PD-së për shtëpi qindra mijëra euro, duke u shprehur se ka deputetë të korruptuar. Në këtë kuadër ai tha se nuk kemi pse të akuzojmë Edi Ramën, kur në grupin parlamentar të PD-së kemi deputetë që kanë shtëpi 300 apo 400 mijë euroshe.

Pak ditë pas këtij fjalimi dhe shfaqjes në pothuajse të gjitha studio televizive, ku ai artikulonte pothuajse të njëjtat fraza, Elezi është fotografuar sot në një takim me Safet Gjicin.

Takimi është realizuar në hotel Gjallica, ndërsa nga foto që qarkullon në rrjet duket se në tavolinën ku ndodhet Elezi dhe Gjici janë edhe 3 persona të tjerë.

Nuk dihet nëse takimi ka qenë i rastësishëm apo një tentativë e Gjicit, sikundër nuk dihet se për çfarë mund të kenë diskutuar ata me njëri-tjetrin në prani të 3 personave të tjerë.

Ndoshta detaje të takimit mund të zbardhen nga protagonistët apo pjesëmarrësit në të, por interpretimet mund të jenë të shumta.

Mund të jetë tentativë e Gjicit për të ofruar Elezin, i vendosur në qendër të vëmendjes në pothuajse të gjitha mediat në javën e fundit, në një kohë kur duket se partitë politike po ndezin motorët e fushatës për zgjedhjet e ardhshme vendore.

Gjici, kandidat për deputet në zgjedhjet e fundit, dhe në 2015 kandidat për kryebashkiakun e Kamzës, mund të synojë një tjetër kandidim, atë të Kryebashkiakut të Kukësit.

Ndërkohë, Elezi thotë se ka qënë Gjici ai që e ka përshëndetur për vetëm dy minuta, se nuk ka miqësi me të, përveç pasionit për futbollin

“Safet Gjicin e njoh vetëm si President të Kukësit. Na lidh pasioni për futbollin. Takimi me të mëngjesin e sotëm ka qënë fare rastësor. Unë po pija kafe me disa miq të mij artistë, ndërsa Gjici erdhi aty bashkë me futbollistët. Më përshëndeti dhe u ul në kafe vetëm për dy minuta. Shok e ka Flamur Noka atë, e ka ndihmuar Gjici në Shumë raste”, tha Elezi.