IKM sqaron anëtarët: Nuk ka shtyrje të Deklaratës vjetore të Tatim Fitimit dhe as të datave të pagesave të detyrimeve tatimore

Deklarimi i kryeministrit Rama gjatë prezantimit të paketës financiare për bizneset, se shtyhet data e dorëzimit të bilancit nga 31 marsi në 1 qershor, ka krijuar konfuzion tek bizneset. Kjo pasi nuk ishte e qartë nëse bashkë me dorëzimit e bilancit ishte shtyrë dhe data e dorëzimit të Deklaratës vjetore të Tatim Fitimit, ndërkohë që nuk ka dalë ende i shkruar ndonjë vendim.

Procedura ligjore mbi dorëzimin e deklaratës së pagesës së tatimit fitimit dhe pasqyrave financiare për vitin fiskal 2019 parashikon që tatimpaguesi duhet të dorëzojë, formularin e Deklarimit të Tatimit mbi Fitimin sipas modelit të miratuar me Udhëzim. Ky formular plotësohet në përputhje me shënimet sqaruese. Po kështu, ai dorëzon vetëm elektronikisht në administratën tatimore, bilancin kontabël së bashku me pasqyrat financiare dhe anekset e tij.

Tatimet bënë fillimisht të ditur jo zyrtarisht se nuk ka shtyrje të  formularit të Deklarimit të Tatimit mbi Fitimin. https://www.monitor.al/shtyhet-afati-i-dorezimit-te-bilancit-por-jo-deklarata-e-tatim-fitimit/

Gjatë ditës së sotme dhe Instituti i Kontabilistëve të Miratuar (IKM) ka sqaruar se nuk ka shtyrje për deklaratën e tatim fitimit. “Nga komunikimet e fundit me organet shteterore, ju informojme se nuk ka ndryshim për datën e dorëzimit të Deklarates vjetore të Tatim Fitimit (mbetet ende data 31 Mars 2020), po kështu nuk ka ndryshim në datat e parapagimeve si dhe pagesave të detyrimeve të tjera tatimore. Pasqyrat Financiare do të dorëzohen në organet tatimore sipas afatit të përcaktuar në Aktin Normativ të Keshillit të Ministrave. Në rast se do të ketë ndryshime ose zhvillime të reja do të njoftoheni nëpermjet një emaili tjetër”, thuhet në një email që u është dërguar anëtarëve të IKM.

Bizneset do të duhet të paguajnë tatim fitimin shtesë

Për bizneset, shtyrja e afatit të dorëzimit të bilanceve, ndërkohë që duhet të dorëzojnë deklaratën e tatim fitimit nuk përbën asnjë lehtësi, pasi të dyja janë të lidhura ngushtësisht bashkë (që të dorëzohet deklarata, duhet mbyllur bilanci).

Për më tepër që deklarimi i formularit për tatimfitimin e ngarkon biznesin me pagesë shtesë, nëse ai ka dalë me fitim më të lartë në 2019-s, pasi tatimfitimi është parapaguar me shifrat e bilancit të vitit të shkuar.

Detyrimi për deklaratën e tatim fitimit, praktikisht imponon financiarët që ta përfundojnë bilancin, ndonëse mund të mos e dorëzojnë atë. Financierët e kanë pasur të vështirë t’i mbyllin bilancet, pasi marsi, që është periudha kulmore e tyre përkoi me karantinën, çka bëri që shumë biznese të mbylleshin dhe ekonomistët të kishin probleme në lëvizjen nëpër zyra për sigurimin fizik të dokumenteve.

Shqetësimi tjetër i bizneseve lidhet me faktin se ata do të duhet të parapaguajnë këstet e tatim fitimit për 2020-n bazuar në bilancin e 2019-s, kur fitimet e këtij viti pritet të jenë shumë më të ulëta. Burime nga tatimet thanë për Monitor se këstet gjenerohen automatikisht nga sistemi, por në rast se kjo situatë zgjat, do të shihet se çfarë mund të bëhet për të mos rënduar bizneset./Monitor/