IKSHPK konfirmon rastin e parë me linë e majmunëve në Kosovë

Instituti Kombëtar i Shëndetësisë të Publike të Kosovës, IKSHPK, sot ka bërë të ditur se Laboratori i Mikrobiologjisë ka konfirmuar një rast të importuar të Mpox, i njohur si lia e majmunëve.

“Rasti i gjinisë mashkullore, 30 vjeç, shtetas i Republikës së Kosovës, është spitalizuar në Klinikën Infektive/QKUK me datë 24.12.2024, pas kthimit nga një shtet i Afrikës Perëndimore, me simptoma si temperaturë, ethe, ndryshimet në lëkurë, në fytyrë, në duar dhe kruarje,” thekson IKSHPK përmes një njoftimi ndërsa konfirmohet se pacienti është në gjendje shëndetësore stabël duke përfunduar:

“IKSHPK i ka gjurmuar të gjitha kontaktet e deklaruara të personit të infektuar dhe të familjarëve të tij, të cilëve u janë dhënë rekomandimet për masat e parandalimit dhe të kontrollit të infeksionit.”

Ndryshe, IKSHPK tërheq vëmendjen për kujdes të qytetarëve, sepse personat që preken nga Mpox zakonisht përjetojnë simptoma të lehta apo mesatare që zgjasin dy deri në katër javë, dhe shërohen plotësisht. Dhe, ndonëse duhet vigjilencë, nuk ka vend për panik.