Iku dhe KLP/ Burri i deputetes së PS emërohet prokuror, pa magjistraturë!
Nuk ka qytetar në Shqipëri që të ketë pasur iluzione se Këshilli i Lartë i Prokurorisë, KLP, i kryesuar nga Gent Ibrahimi mund të jetë profesional dhe i pavarur. Kjo u konfirmua edhe sot me vendimin e KLP për të caktuar në detyrën e prokurorit pranë Prokurorisë së Shkallës së Parë Tiranë, Bledar Valikaj, pasi ky i fundit si bashkëshort i deputetes së PS, Ermonela Felaj, më 25 mars, mori nga KLP edhe statusin e prokurorit.
KLP mund t’i referohet sot një vendimi të Gjykatës Administrative të Apelit e cila e detyron KLP-në që ta emërojë prokuror, por sipas Reformës në Drejtësi të Edi Ramës, prokurorë mund të emërohen vetëm ata që kanë të kryer Shkollën e Magjistraturës.
Ndërkohë KLP miratoi edhe raportin për analizën e aftësive profesionale të 10 prokurorëve kandidatë për në SPAK. KLP bëri me dije se një kopje e ketij raporti i dërgohet menjëherë KPK-së dhe ONM për procesin e vettingut.
Prokurorët që janë vlerësuar në kuadër të rivlerësimit kalimtar janë: Manjola Kajani, Ened Nakuci, Eugen Beci, Njazi Seferi, Doloreza Musabelliu, Blerim Tominaj, Elisabeta Imeraj, Olsian Cela, Perparim Kulluri dhe Vladimir Mara.
Këshilli i Lartë i Prokurorisë sot ka vendosur edhe për zëvendësimin e disa drejtuesve të prokurorive pas shkarkimit nga vettingu të titullarëve të mëparshëm në këto institucione.
KLP caktoi Sali Hasën, drejtues të përkohshëm të Prokurorisë Sarandë pas shkarkimit të Edison Ademit. Propozimi i Sali Hasës për drejtues i Prokurorisë Sarandë është miratuar me 7 vota pro.
Ludovik Doda caktohet drejtues i përkohshëm i Prokurorisë së Apelit Durrës me 10 vota pro pas shkarkimit të Ferdinand Elezit.
Po kështu është miratuar me 5 vota pro, caktimi në detyrë (rikthim në sistemin e prokurorisë) pranë Prokurorisë së Shkallës së Parë Tiranë, i prokurorit Leonard Filopati për shkak të mbarimit të afatit të komandimit në Ministrinë e Drejtësisë.
