Iku Ilir Meta i 2 Marsit, Ilir Rama i 22 Prillit “live” i vë kazmën Kodit Penal
Presidenti i Republikës, Ilir Meta i 2 Marsit, sot është thjeshtë një iluzion që kishte opozita për ta shpëtuar Kushtetutën. Këtë e demonstroi me spektaklin e radhës duke i vënë kazmën Kodit Penal me ndryshimet aq shumë të diskutueshme, dhe për ti treguar besnikërinë Kryeministrit Edi Rama mohoi dhe faktin që Kryeministri po e përdor situatën për pushtet, sot kur ajo është përkeqësuar shumë më shumë se më 2 Mars.
Spektaklin e filloi me ndryshimet në Kodin Penal! Të gjithë përveç Edi Ramës deri më sot ishin kundër këtyre ndryshimeve, madje debat kishte edhe në Komisionin monist të Ligjeve, por sot Kryeministrit iu bashkua edhe Ilir Meta duke i vlerësuar ato si të nevojshme në këtë kohë të fatkeqësisë natyrore.
“Ju përgjigja kërkesës së Kuvendit për ndryshimet në Kodin Penal, duke i dekretuar, pasi janë të nevojshme. Nisur nga zhvillimet, nga gjendja e fatkeqësisë, por mbi të gjitha për shkak të boshllëkut ligjor që ka Kodi Penal, sa i takon veprimeve që kryhen me dashje, Presidenti vlerëson se iniciativa e Kuvendit dhe qeverisë, që mbrojtja e shëndetit të garantohet edhe nga norma penale, duhet mbështetur. Presidenti konstaton se mes draftit të prezantuar fillimisht nga deputetët dhe përmbajtjes finale ka shumë ndryshime thelbësore pozitive, që kanë reflektuar një pjesë të sugjerimeve të shoqërisë civile, avokatit të popullit dhe Presidentit.”
Për të dëshmuar se ky vend ngeli edhe pa President, ishte përgjigja që dha për fasoneritë. Pavarësisht se nuk përfilli paralajmërimet e opozitës dhe liderit të saj Lulzim Basha, për rrezikun që mbartë puna në fasoneri të 70 mijë grave dhe vajzave, Ilir Meta doli në krah të Edi Ramës kur brenda 24 orëve kemi 18 të prekur me COVID-19 në një fasoneri dhe 86 brenda pak ditësh:
“Mjaft rëndësi të respektohen distancat sociale dhe të ketë standarde të detyrueshme për çdo aktiviteti, nënvlerësimi ka kosto të jashtëzakonshme. Kjo do të jetë një kosto financiare, ekonomike, dhe psikologjike e shtuar prandaj që duhet një përqëndrim më i madh në këtë drejtim për të parandaluar vatrat e reja,” ishte e gjitha që kishte për të thënë Ilir Meta për fasoneritë tashmë si vatra të COVID-19 dhe kërkesës së Partisë Demokratike për mbylljen e tyre.
Në fund, për ti vënë vulën ndryshimeve politike në Presidencë dhe atyre që ishin të shqetësuar pse heshtë Kryetarja e LSI, Monika Kryemadhi, Ilir Meta nga i cili nuk ka mbetur as ajo shqiponja me të cilën abuzoi që nga dita e parë që shkeli në politikë dhe solemnisht me paturpësi më 2 Mars , foli për menaxhimin e situatës së krijuar nga koronavirusi nga kryeministri Edi Rama, dhe nëse ky i fundit po e përdor situatën për pushtet.
“Shqetësimi im është shëndeti i çdo qytetari dhe i ekonomisë sonë kombëtare. Nuk besoj se është koha për të përdorur apo keqpërdorur cilido për qëllime pushteti një krizë të tillë, pasi do të ishte tepër e papërgjegjshme dhe me kosto të madhe për cilindo që do ta përdorte!”
Ka ndryshuar Edi Rama nga 2 Marsi! Të gjithë e kanë të qartë se PO madje Kushtetuta për të cilën ishte i shqetësuar Presidenti më 2 Mars është shkelur me të dy këmbët nga Kryeministri.
Por, ka ndryshuar edhe Ilir Meta. Sot më 22 Prill kur paligjshmëria ka marrë dhenë dhe toka, uji dhe ajri shqiptar janë nën terrorin e Kryeministri Edi Rama, Presidenti i tij dhe rilindjes është Ilir Rama!
