Ilaç i ri për Alzheimer, ngadalëson sëmundjen për 30%

Jemi në prag të një epoke të re të trajtimit të sëmundjes Alzheimer. Në fakt, është treguar se tashmë ilaçi i dytë në më pak se një vit, e ngadalëson këtë sëmundje. Ekspertët thonë se tani jemi “në prag” të disponueshmërisë së ilaçeve, diçka që para pak kohësh konsiderohej e pamundur.

Kompania farmaceutike Eli Lilly ka bërë të ditur se ilaçi i saj, Donanemab, ngadalëson shkallën e sëmundjes së Alzheimerit me rreth një të tretën. Megjithatë, dy vullnetarë, dhe ndoshta një i tretë, vdiqën si pasojë e ënjtjes së rrezikshme të trurit, raporton BBC

Si funksionon ilaçi i ri?

Donanemab funksionon në të njëjtën mënyrë si Lekanemab, i cili u bë lajm në mbarë botën kur u dëshmua se ngadalëson sëmundjen. Të dyja kanë të bëjnë me antitrupa, si ato që trupi prodhon për të sulmuar viruset, por ato janë të ideuara për të pastruar pisllëkun ngjitës nga truri, të quajtur beta amiloid.

Amiloidi grumbullohet në hapësirat midis qelizave të trurit, duke formuar pllakat karakteristike që janë një nga shenjat dalluese të sëmundjes Alzheimer.

“Beteja prej dekadash për të gjetur trajtime që ndikojnë në sëmundjen e Alzheimerit po ndryshon,” tha kreu i klinikës së çrregullimeve konjitive në Spitalin Kombëtar të Mbretërisë së Bashkuar për Neurologjinë dhe Neurokirurgjinë, Dr Cath Mummery, duke shtuar:

“Tani po hyjmë në një periudhë modifikimi të sëmundjes, ku mund të shpresojmë të shërojmë dhe trajtojmë dikë me sëmundjen Alzheimer, me shërim afatgjatë të sëmundjes dhe jo me kujdes paliativ dhe mbështetës.”