“Ilir Meta”/ Gjiri i Lalëzit, aty ku lindi dashuria për pushtet dhe urrejtja ndaj…
Është autor i shumë dashurive të çuditshme politike, por kur nuk është pjesë e tyre, Ilir Meta nuk duron madje për Edi Ramën dhe Lulzim Bashën që guxuan të bëjnë pakt pa Metën, Monën dhe Gjirin e Lalëzit ai i quan të papërgjegjshëm:
“Nuk ka gjë më të mirë sesa dashuria por me rëndësishme për një politikan është përgjegjshmëria dhe unë mendoj se ata të dy kanë reflektuar një mungesë të përgjegjshmërisë prej një kohë të gjatë, në mënyrë të veçante gjatë këtij viti.
Kjo ka qenë një situate artificiale, ky polarizim nuk ekziston poshtë në shoqëri, çdo gjë është e imponuar nga lart, një antagonizëm i orkestruar nga lart, ndonjëherë më duket se është e orkestruar nga jashtë për ta mbajtur në një ngërç Shqipërinë. Një vend që duhej t’i ishin hapur negociatat me kohë.
Nëse ata reflektojnë tani është gjë shumë e madhe, ua kam kërkuar prej kohësh, e pamundur deri tani për shkak të vullnetit të tyre.”
Ndërsa u pyet për lajmin e publikuar nga miqtë e tij gazetarë se ishte takuar me Edi Ramën te Gjiri i Lalëzit, Presidenti Meta u shpreh:
“Skam pasur mundësi të takohem me Ramën, por vazhdoj e pres, unë i takoj të gjithë se kjo është detyra ime.”
I pyetur pse nuk e kishte thirrë Këshillin e Sigurisë Kombëtare pas informacioneve për djegie të Parlamentit, përgjigja e Ilir Metës ishte jobindëse po aq sa informacioni “i shërbimeve” të cilin e bëri publik në Komisionin Hetimor për shkarkimin e tij:
“Për informacion në fjalë, ka mbërritur në datën 7 qershor, por unë kam ardhur në 8 pasdite, së dyti nuk besoj se do të zgjidhte diçka Këshilli i Sigurisë Kombëtare, se të gjithë ishin në fushatë, sikurse e thash kam bërë përpjekje për tu takuar me Rucin por ka qenë në Tepelenë.
Por i gjithë gjykimi i situatës ka qenë kompleks dhe çdo vendimmarrje e mëvonshme do të ishte e padobishme, se nëse do të dilte diçka jashtë kontrollit do të ishte shumë e vështirë.”
Mbyllja e kësaj konference ishte po aq kriminale sa fillimi. I “ngacmuar” nga gazetarët nëse ishte ndjerë xheloz për faktin se Rama dhe Basha janë të sinkronizuar në qëndrimin se në 18 tetor Shqipërisë do t’i hapen negociatat, ai tha jo dhe zhvendosi me këtë rast edhe dekoratat presidenciale.
“Që unë të bëhem xheloz për Ramën këtë se pranon as vete ai, ju i dini kontributet e mia për Edin. Dhe për situatën aktuale, mua më vjen keq, se gjithmonë i kam thënë më dëgjo mua se të del mire kur me dëgjon mua. Madje edhe disa diplomatëve u kam thënë: Ore mos ma merrni në qafë Edin, se i thonë mirë mirë, dhe kujton se e ka mirë, dhe pastaj merr në qafë edhe vendin, se ne kemi edhe hallin e Edi përveç të vendit, që është kryesori për mua,” u shpreh Ilir Meta duke dëshmuar se nuk është as institucional dhe është i gatshëm ta dekoroj me Urdhërin e Skenderbeut edhe njeriut që shkatërroi vendin:
“Unë të jem xheloz? Unë i jap dekoratë atij vetëm të marrë datën e çeljes së negociatave, ai le të mos e pranojë. Bile do ti jap Urdhrin e Skënderbeut.
Dekoratën bëhuni gati, bile dy, edhe si kryeministër edhe si ministër i jashtëm.
Ndërsa Bashës nuk i jap se ai ka braktisur institucionet, as Monikës se i ka dhënë besën Bashës, kështu që jemi në rregull.”
