Ilir Meta paralajmëroi video përvëluese, Ardian Dvorani: Nuk merrem me filma…
Presidenti i Republikës ka paralajmëruar javë më pare se do të publikoj video që ai mendon se kanë “prova të reja përvëluese”, por kreu i KED, Ardian Dvorani, sot pas daljes nga Prokuroria ku u mor në pyetje për 3 orë pas padisë së ngritur ndaj tij nga Ilir Meta, i pyetur nëse ishte përballur me një provë të këtij lloji tha se personat që kanë përgjegjësi kushtetuese dhe publike duhet të mos merren me filma me metrazh të shkurtër apo të gjatë.
“S’mund të flas me detaje, e vlerësoj që hetimi nuk zhvillohet as në TV as në media, aty kam bërë parashtrimet e hollësishme të detajuara të faktit si ka ndodhur dhe shpjegimin pse ka ndodhur.
Për videot, unë mendoj që institucionet, funksionarët kushtetues e publikë, nuk i shtrojnë çështjet e nuk është e mira t’i shtrojnë me produkte artistike, me filma seriale, me metrazh të shkurtër e të gjatë. Institucionet duhet ti shtrojnë në rrugë institucionale. Unë nuk merrem me këtë punë,” tha Ardian Dvorani duke shtuar se nuk ka asgjë të veçantë për të deklaruar në zbatim të rregullave të kodit të procedurës penale, i është dërguar thirrja dhe ai sqaroi se përmbushi detyrimin për tu dhënë përgjigje pyetjeve të tyre.
Lidhur me akuzat e Ilir Metës, kreu I KED sqaroi:
“Unë dola përpara prokurorëve sic e ka detyrimin cilido kam shpjeguar faktet e rrethanat si kanë ndodhur që prokuroria ka autoritetin për ti verifikuar.
Unë jam gjyqtar e s’mund të jem gjithë kohën në media, e kam dhënë qëndrimin tim por s’ka rëndësi çfarë mendoj unë, madje mund të them se s’ka rëndësi as çfarë mendon presidenti, tani është prokuroria që do bëjë verifikimet dhe në përputhje me ligjin do vlerësojë dhe më pas gjykata nëse do jetë rasti i gjykatës. Prokurorët janë duke kryer verifikimet dhe unë s’kam asnjë autoritet të pengoj hetimin,” tha Ardian Dvorani duke i dhënë fund edhe thashethemeve në shërbim të Ilir Metës se Dvorani do të bëjë kallëzim penal ndaj Presidentit të Republikës:
“Unë nuk jam në garë me kërkënd, nuk llogaris askënd, nëse ligji e kushtetuta me imponon ta bëj një gjë të tillë, do ta bej”.
Ndryshe, pas “luftës” që Presidenti i Republikës hapi me kreun e KED, Ardian Dvorani, zëdhënësi i Ilir Metës javë më parë përmes rrjetit social Facebook tha se brenda javës institucioni i Presidencës do të publikojë një video me fakte të pakundërshtueshme për opinionin vendas dhe botëror, që të mos ngelet asnjë analfabet në planet, i cili të mos e kuptojë dhunimin që një bandë ka tentuar t’i bëjë Kushtetutës dhe Gjykatës Kushtetuese të Republikës së Shqipërisë.
