“Imuniteti”, Prokurorët e SPAK: Me akuzat e reja, Belinda Balluku rrezikon 35 vite burg!
“Belinda Balluku rrezikon deri në 35 vite burg”, kështu janë shprehur Prokurorët e SPAK në Këshillin për Rregulloren, Mandatet dhe Imunitetin, ku po diskutohet imuniteti i Ish-Zv/kryeministres së pandehur pas kërkesës për arrestim, duke e bërë të qartë tashmë se pozita e saj është rënduar.
“Në masat e para të kërkuara znj. Balluku rrezikonte deri në 10 vite burg! Sot që flasim situata e saj është rënduar, dhe me akuzat e prokurorisë në këtë moment znj. Balluku rrezikon deri në 35 vite burg,” kanë deklaruar Prokurorët e SPAK para Këshillit për Rregulloren, Mandatet dhe Imunitetin, ku u pa qartë nga pyetjet se deputetët socialistë kot e kishin kërkuar dosjen “Balluku” pasi atë nuk e kishin lexuar fare.
Pasi prezantuan provat e reja për Belinda Ballukun dhe pasi janë dëgjuar nga anëtarët e Këshillit, tre prokurorët e SPAK, Klodian Braho, Dritan Brençi dhe Dorina Bejko janë larguar.
Ndërsa diskutimet vijuan mes anëtarëve të Këshillit për Rregulloren, Mandatet dhe Imunitetin, pritet që ata të hartojnë edhe një raport, që do ta çojnë në Parlament për miratim në seancën plenare të 5 marsit.
Opozita u shpreh se ka prova të mjaftueshme për ta dërguar çështjen në parlament dhe për ta votuar heqjen e imunitetit, me qëllim që t’i hapet rruga arrestimit të Belinda Ballukut, por kështu nuk mendojnë edhe përfaqësuesit e mazhorancës.
Ish-Ministri i Drejtësisë së Edi Ramës, Ulsi Manja, që u shpreh kundër kërkesës së SPAK.
“Masat e marra nga SPAK deri tani për Ballukun janë të mjaftueshme për hetimin,” mësohet se ka thënë ndër të tjera Ulsi Manja pasi përfaqësuesit e SPAK, kreu i saj Klodian Braho dhe prokurori Dritan Prençi, kanë lënë Këshillin për Rregulloren, Mandatet dhe Imunitetin.
Sipas SPAK, Belinda Balluku akuzohet se ka intimiduar dëshmitarët, që janë të pandehur ose jo në dosje, gjithashtu ka tentuar prishjen e provave, dhe ekziston rreziku të kryejë krime të tjera gjithashtu. Me këtë rast konfirmoi se në datë 20 Nëntor 2025 ka intimiduar dy dëshmitarë, duke i kërkuar të ndryshojnë dëshminë.
Po ashtu, prokuroria informon se ka prova se disa persona “të fortë” (duke nënkuptuar elementë të krimit të organizuar) kanë kërcënuar dëshmitarët në emër të zonjës Balluku. Për këtë kanë paraqitur edhe provat në mbledhjen e Këshillit – transkripte të bisedave.
Me përfundimin e mbledhjes së Këshillit të Mandateve dhe Imuniteteve për heqjen e imunitetit të Belinda Ballukut, për të cilën SPAK po kërkon arrestimin, kreu i Grupit Parlamentar të PD, Gazment Bardhi, tha se opozita ishte për dhënin e autorizimit për arrestim por Edi rama kishte dhënë urdhër:
“Nuk ka asnjë vendim të Këshillit të Mandateve që seanca të ishte me dyer të mbyllura. Nuk kishte asnjë surprizë. Rama urdhëroi 5 anëtarët e PS në këshill të bëheshin mbrojtje politike për të korruptuarën Belinda Balluku. SPAK konfirmoi se situata penale ndaj Balluku është rënduar tepër krahasuar me masat e para që gjykata ka dhënë ndaj saj. Këto masa deri tani nuk mbrojnë dot hetimin e plotë ndaj Ballukut.”
Ndërsa kreu i Grupit Parlamentar të PS Taulant Balla, ashtu si me rastin e çdo kërkese për arrestimin e ministrave dhe deputetëve hajdut të Partisë Socialiste, tha se nuk janë dakord me propozimin e PD për dhënien e autorizimit
“Diskutimi i sotëm dhe pyetjet e anëtarëve të këshillit ka hedhur dritë mbi elementin thelbësor, prezumimin e pafajësisë. Askush nuk është i fajshëm sa kohë nuk ka një vendim të formës së prerë të gjykatës. Pala tjetër nuk kishte nevojë për shqyrtim se e kishin marrë vendimin e tyre për qëndrimin. Në rastin tonë, në emër të 5 deputetëve të PS kam informuar këshillin e mandateve se sa i përket propozimit të grupit të PD për dhënien e autorizimit ne nuk ishim dakord me atë mënyrë si është propozuar dhe do kemi një diskutim dhe një informim nga ana ime në mbledhjen e parë të grupit parlamentar të PS. Nuk e jep autorizimin Këshilli, por e jep seanca plenare,” tha Taulant Balla duke përfunduar.
Në përfundim të këtij procesi sapo kolegu im Ulsi Manja të ketë hartuar plotësisht raportin në emrin e 5 deputetëve tanë, do kemi dy relatorë, zoti Manja do hartojë raportin tonë ndërkohë që PD do sjellë raportin e saj.”
Ndryshe, Belinda Balluku akuzohet për tenderët abuzivë të Tunelit të Llogarasë në Vlorë dhe Unazën e Madhe në Tiranë.
