Inaugurohet Parku Industrial në Viti, Kryeministri Kurti premton mbështetje për bizneset

Sot është inauguruar Parku Industrial në Budrikë të Vitisë, e cila do të jetë funksionale për bizneset e kësaj komune dhe rrethinës së saj. Vlera e këtij investimi është 1.7 milionë euro.

Investimet në këtë Park, u tha me këtë rast, kanë krijuar hapësira të gatshme dhe të përshtatshme për vendosjen e bizneseve të vendit dhe të huaja, duke u bë një klimë e favorshme për të bërë biznes në Kosovë.

Kryeministri, Albin Kurti tha se Parku do të jap një kontribut të jashtëzakonshëm për rritjen dhe zhvillimin ekonomik dhe rajonal. Hapësira prej 16 hektarësh, vlerësoi ai, do të shfrytëzohet nga bizneset që aty do të gëzojnë energji elektrike, ujë e internet dhe shërbime të tjera.

“Do të nxisë veprimtari prodhuese dhe përpunuese me teknologji të përparuar, do të ofrojë punësim dhe aftësim për të rinjtë tanë si shtyllë e zhvillimit dhe transformimit progresist të vendit tonë. Si dhe do të rrisë bashkëpunimin ndërmjet bizneseve. Falë këtij Parku, ato të do të kursejnë deri në 30 për qind të investimit të tyre në total,” tha Kurti i bindur se të rinjtë do të kenë më shumë mundësi të reja për punësim në vend, se sa t’i kërkojnë ato jashtë vendit.

“Të rinjtë tanë do të kenë më shumë mundësi të reja në vend më përpara, e në vend se t’i kërkojnë ato jashtë vendit. E këtë hapësirë që po e inaugurojmë sot do ta gëzojnë së shpejti përmes thirrjeve publike rreth 30 biznese. Në tre vitet e ardhshme do të investojmë edhe 33 milionë euro për ndërtimin parqeve të reja industriale, përmes tyre po ofrojmë hapësirë shtesë për biznese dhe po nxisim edhe më shumë ndërmarrësin, parakushte këto për punësim, zhvillim e transformim,” tha Kryeministri i Kosovës, Albin Kurti duke theksuar se po mbështesin vazhdimisht bizneset për investime të qëndrueshme.

Ministrja e Industrisë, Ndërmarrësisë dhe Tregtisë, Rozeta Hajdari, nga ana e saj tha se kjo zonë do të bëhet tërheqëse për investimet të përgjegjshme e nga diaspora.

Ndërsa kryetari i Vitisë, Sokol Haliti, tha se pret që ky Park të lulëzojë me biznese të reja.