Inceneratorët dhe Ahmetaj në hotelet luksoze, Berisha: Peshku i madh është Edi Rama!

Duke denoncuar aferën e inceneratorëve, Kryetari i Partisë Demokratike, Sali Berisha, sot akuzoi Ish-Zv/Kryeministrin Arben Ahmetaj se qëndrimet e tij me hotelet me 5 yje janë paguar me kartën e kreditit të Klodian Zotos por janë para të taksapaguesëve shqiptarë.

Dokumentet e publikuara në kuadër të luftës së brendshme, ishin në dosje por nuk janë marrë parasysh nga SPAK, tha Kryetari i Partisë Demokratike, duke konstatuar se Klodian Zoto është peshku i vogël e peshku i madh është, Edi Rama!

“Punonjësit e kompanisë Rama-Agaçi-Ahmetaj-Veliaj, kanë financuar vizitat turistike, netët e luksit në hotelet me pesë yje të Arben Ahmetajt, asokohe ministër i Ekonomisë, sigurisht jo me para të veta, por të sipërmarrjes qeveritare të vjedhur nga taksapaguesit shqiptarë,” tha sot Sali Berisha duke denoncuar të paktën pesë raste ku Klodian Zoto ka paguar me kartën e tij të kreditit:

“Klodian Zoto, ka paguar me kartën e vet të kreditit, të paktën në pesë raste të raportuara qëndrimin në hotele me 5 yje të Arben Ahmetajt.

Kjo vërteton plotësisht deklaratën e PD-së dhe opozitës, e cila ka denoncuar me kohë skemën e mega-vjedhjes së 430 milionë eurove,” tha Berisha duke akuzuar Arben Ahmetajn dhe shefin e tij, Edi Rama, që kanë rolet më kryesore në këtë aferë.

“I pari Edi Rama, përmes firmave që ka hedhur, dhe përdorimit të shefit të tij, Engjëll Agaçit, ka qenë njeriu më kryesor i të gjithë procesit korruptiv. Pra, kemi të bëjmë me një grup të strukturuar kriminal, me Edi Ramën në krye, që kanë përfituar nga kjo mega-aferë korruptive.

Edi Rama, në kundërshtim me ligjet e vendit, në kundërshtim me opinionin e Agjencisë së Prokurimeve Publike, ka firmosur kontratën me negociatat të mbyllura, në mënyrë antiligjore.

I dyti, Arben Ahmetaj, përmes njohjeve me të kërkuarit e drejtësisë, gjë që e ka mohuar vazhdimisht, ka luajtur rolin e ndërmjetësit sipas një skeme të qartë piramidale,” tha kryedemokratik duke saktësuar se Arben Ahmetaj është personi, pa firmën e të cilit, nuk mund të merrte vlerë asnjë dokument i kësaj afere.

“Arben Ahmetaj është personi, pa firmën e të cilit, nuk mund të merrte vlerë asnjë dokument i kësaj afere.
Është personi që së bashku me Edi Ramën, kanë firmosur vjedhjen nga fondi rezervë i Këshillit të Ministrave.

Nuk është rastësi që ministri më i fuqishëm i Ramës, Tigri i oborrit, rrëzohet në të njëjtën makinë me Zoton e tij, dhe fle në të njëjtin hotel luksoz me këtë person.

Askush të mos gënjehet. Hotelet e shtrenjta nuk janë paguar me kartat e kreditit të Zotos. JO! Ato janë para të taksapaguesve shqiptarë, që Rama ua merr dhe ua kalon vetes, ministrave dhe hajdutëve të oborrit.

Këto para kanë ikur për blerjen e votave, për lobimet korruptive ndërkombëtare dhe për blerjen e drejtësisë,” tha Kryetari i Partisë Demokratike duke vlerësuar se dokumentet e publikuara dolën nga lufta e brendshme në SPAK-un e partisë, por peshku i madh është Edi Rama:

“Dokumentet e publikuara në kuadër të luftës së brendshme, kanë qenë në dosje dhe nuk janë marrë parasysh, tregon se ky është SPAK-u i partisë, i kontrolluar çdo ditë nga Edi Rama.

Askush nuk duhet të harrojë se mijëra euro në hotelet luksoze janë një pikë në oqean para milionave të vjedhura ku lundrojnë Rama dhe ministrat e tij,” tha Kryetari i Partisë Demokratike, Sali Berisha, duke përfunduar:

“Zoto është peshku i vogël, peshku i madh, Edi Rama, fluturon me çarter me dhomë gjumi luksoze.
Prandaj dy ditë, përpara 8 dhjetorit, Ditës Ndërkombëtare të Korrupsionit, Shqipëria ngjitet në majë të shkallares së turpit përsa i përket vjedhjes dhe kapjes së shtetit.

Të gjitha këto janë apel për çdo qytetar shqiptar, të ngrihet me guxim për të rrëzuar këtë qeveri që vjedh dhe vetëm vjedh.”

Ndryshe, në një kallëzim të depozituar të premten në SPAK nga gazetari Adriatik Doçi, pretendohet se prokurorët Klodian Braho dhe Eneid Nakuçi që po hetojnë dosjen e inceneratorëve, kanë fshehur provat të cilat fajësonin Ish-Zv.ryeministrin Arben Ahmetaj se qëndrimin e tij në disa hotele jashtë vendit i kishte paguar Klodian Zoto.