“Inceneratori i Tiranës”, Berisha: Edhe pse dy ministra e paralajmëruan, Rama firmosi me urgjencë bonusin

Kryetari i Partisë Demokratike, Sali Berisha, edhe sot publikoi dokumente të reja që, sipas tij, hedhin dritë mbi amnistinë e Kryetarit të Bashkisë Erion Veliaj lidhur me çësthjen “Inceneratori i Tiranës” nga treshja famëzezë Kraja-Prençi-Gjoka, duke e cilësuar edhe si krimin më monstruoz në historinë e drejtësisë.

Ndërsa publikoi një shkresë të skandalit, Kryetari i Partisë Demokratike tha se Erion Veliaj ushtroi presion për bonusin dhe Edi Rama firmosi me urgjencë ndonëse u paralajmërua nga ministrat Ermonela Felaj dhe Ylli Manjani

“Unë e kuptoj që prisni që unë të flas për lidhjet e Edi Ramës me sponsorin e terrorizmit Al Alabar, por kjo do jetë objekt pasi të mblidhen informacionet e reja, i konferencave të ardhshme, sot unë jam para jush përsëri për vjedhjen e shekullit të qytetarëve shqiptarë, që është djegësi i Tiranës.

Aq sa mund të ndash blozën e zezë nga tymi, mund të ndash Erion Veliajn dhe Edi Ramën nga vjedhja e shekullit.

Dosja e amnistisë e Erion Veliajt nga treshja famëzezë Kraja-Prençi-Gjoka është një krim monstruoz në historinë e drejtësisë shqiptare.

Por unë nuk jam sot këtu për të bërë pretencën ndaj këtij grupi të organizuar kriminal, që përdor pushtetin për të mbrojtur autorët kryesorë të vjedhjes së shekullit.

Ajo çka unë duhet të theksoj, se në qindra e qindra faqe të dosjes në bazë të së cilës janë lëshuar 15 urdhër-arresti për djegësin e Tiranës, nuk përmendet as dhe njëherë të vetme emri i Erion Veliajt, pa lëre më i Edi Ramës, çka dëshmon në mënyrë të padiskutueshme se këto arrestime kanë pasur për qëllim krijimin e një mburoje për Erion Veliaj dhe vetëkuptohet për Edi Ramën, për vjedhjen e shekullit.

Erion Veliaj është personi direkt që me firmë dhe vulë, ka ndryshuar në funksion të vjedhjes, plaçkitjes së pasurive publike në bashkëpunim me Edi Ramën, Engjëll Agaçin, Artur Metanin, strategjinë e trajtimit të mbetjeve urbane të hartuar nga Korporata Ndërkombëtare Financiare dhe Agjencia Japoneze e Ndihmave Xhajka.

Sipas kësaj strategjie, për qytetin e Tiranës, duhej të aplikohej grumbullimi, seleksionimi, riciklimi, ripërdorimi dhe depozitimi në landfill, në mënyrë që mbetjet që mbeteshin për depozitim të ishin sa më të pakëta. Megjithëkëtë, këto dy kompani shumë serioze rekomandojnë që zgjerohet landfilli i Tiranës ose të krijohet një landfill tjetër rajonal.

Por Erion Veliaj, në përputhje me interesat e tij dhe të Edi Ramës, këtë strategji e ndryshon dhe e kalon në djegien e mbetjeve, gjë e cila vlerësohet nga Xhajka si metodë e kushtueshme dhe nuk rekomandohet për realitetin shqiptar.

Në rast se Erion Veliaj nuk do ndryshonte strategjinë e trajtimit të mbetjeve urbane nga grumbullim, seleksionim, riciklim, ripërdorim dhe depozitim në djegie, natyrisht nuk do ekzistonte vjedhja e shekullit, kjo megaaferë krruptive e përmasave 1 miliard.

Por jo vetëm kaq, Erion Veliaj nuk është mjaftuar me ndryshimin e strategjisë së djegësave. Ai ka ndryshuar praktikën e përdorur në Elbasan dhe Fier për prokurimin e djegësve.

Nëse djegësi i Elbasanit dhe Fierit u prokuruan me fonde publike me çelësa në dorë, Erion Veliaj vendos që për Tiranën, trajtimi i mbetjeve me djegie të jepet me koncesion për 30 vite, duke ngarkuar taksapaguesit e qarkut të Tiranës me një peshë prej 1 miliard eurosh gjobë të tmerrshme, natyrisht të përfituara nga ai dhe sipërmarrja e tij.

Veprimet, firmat e Erion Veliajt janë në themel të vjedhjes së shekullit, se ai personalisht me firmën e tij, në një akt mashtrimi të rëndë zyrtar, mori atributet e Këshillit Bashkiak të Tiranës dhe Këshillit të Qarkut të Tiranës.

Pra, nëse ju lexoni akuzën për mashtrim në përputhje me nenin respektiv, mashtrimi më i madh në dosjen e djegësit, është mashtrimi i Erion Veliajt, i cili shprehet në emër të Këshillit Bashkiak dhe Këshillit të Qarkut të Tiranës, se studimi i fizibilitetit, kërkesat e tij, pagesa është plotësisht e përballueshme nga qeveritë vendore, pagesa prej 90 milionë eurosh. Në një kohë kur kryetari i Bashkisë së Tiranës dhe asnjë kryetar bashkie tjetër, nuk ka tagër ligjor, të drejtë ligjor të miratojë një fond as 10 mijë euro pa miratimin e Këshillit Bashkiak.

Pra, rrëmbeu për pasurimin e tij, të gjitha pushtetet e bashkive të qarkut të Tiranës dhe kjo është me firmë.

Këtë akt, Erion Veliaj e ka kryer pasi i është refuzuar nga ministri Shkëlqim Cani, dhe pas largimit të Shkëlqim Canit, i është refuzuar pesë herë me radhë nga ministri i Financave, Arben Ahmetaj.
Në fund, kur Erion Veliaj është zotuar se kjo pagesë do bëhej nga qeveria vendore, natyrisht ministri Ahmetaj nuk kishte të bënte më me buxhetin e shtetit, por ishte në përputhje me ligjin, kompetencë e qeverisë vendore.

Nuk jam dakord me Ahmetajn, Ahmetaj duhej të denonconte menjëherë në prokurori, aktin penal të rëndë të Erion Veliajt,” tha Sali Berisha i sohqëruar dhe nga anëtari i Kryesisë së PD, Belind Këlliçi, duke publikuar shkresën e skandalit që, sipas tij, konfirmon se Veliaj ushtroi presion për bonusin.

“Erion Veliaj ka përgjegjësi të plotë dhe është kryesor në skandalin apo krimin e dhënies së bonusit prej tetë pikësh.

Arben Ahmetaj, i cili ka pasur vetëm një përfaqësues në KVO, është akuzuar se ka ushtruar presion për bonusin në KVO.

Erion Veliaj ka pasur dy përfaqësues, ai dhe jo vetëm ai, kanë ushtruar presion të madh mbi anëtarët, mbi kokat e turkut, punonjësit e bashkisë, që të firmosin në KVO, ndonëse atyre u njohu meritën se kanë deklaruar që kjo nuk mund të bëhet me financimin e bashkisë. Që kanë kërkuar që çështja t’i kalojë për kompetencë Këshillit Bashkiak.

Por presioni ka qenë i rëndë mbi ta.

Tani, meqë jemi këtu, ndaluni për një moment.

Në rastin e klubit Partizani, kryetari i bashkisë, Edi Rama firmos me vulë dhe firmë, ndryshimin e destinacionit. Dhe ai nuk thirret njëherë të vetme në prokurori për t’u pyetur, në një kohë kur këta kanë bërë një propozim, arrestohen. Pra, Rama që bën ndryshimin e destinacionit, amnistohet paçka se shkel në mënyrë flagrante ligjin, kursë këta fakirët që propozojnë, nuk janë këta që vendosin, këta bëhen kurbanë për të shpëtuar Veliajn dhe jo vetëm Veliajn.

Së fundmi, lidhur me rolin direkt të Erion Veliajt në procedurën e djegësit të Tiranës, provon qartë edhe korrespondenca zyrtare mes ministrit Koka dhe ministrit të Drejtësisë, Ylli Manjani.

Siç do ju bëjmë me dije sot, Edi Rama së bashku me Engjëll Agaçin, me vendimin numër 855, datë 7 dhjetor, kanë miratuar dhënien e bonusit 8 përqind ndaj kompanisë Integrated Energy, e cila nuk ekzistonte dhe do krijohej 9 muaj më vonë.

Po në lidhje me këtë çështje, do sjell para jush një shkresë dërguar ministrit Lefter Koka me datën 15 nëntor 2016 nga ministri i Drejtësisë, Ylli Manjani, i cili shprehet se: nisur nga interpretimi literal i kësaj dispozite si dhe nga analiza në tërësi e nenit 25 të ligjit 125/213 që trajton propozimet e pakërkuara, konstatojmë se në asnjë pikë të tij nuk përmendet apo autorizohet shprehimisht Këshilli i Ministrave për miratimin e dhënies së bonusit.

E kuptoni pra si u investua Edi Rama me Agaçin dhe Metanin në vjedhjen e shekullit për xhepat e tyre, për diçka që nuk ua kërkonte ligji.

Dhe këta këtu, bënë propozimin, janë brenda këta se propozuan, kurse këta që vendosën në kundërshtim me ligjin, këta vazhdojnë të mbrojtur në mënyrën më kriminale pa asnjë lloj akuze, të pamarrë në hetim.
Edhe njëherë, në 110 faqe, apo sa ka dosja e fundit, emri i Erion Veliajt nuk përmendet asnjëherë.
Nuk guxojnë të përmendin asnjëherë, ose ua kanë mbyllur gojën me qindra e mijëra euro, zyrtarëve të shitur të sistemit të drejtësisë.

Pika 7 e këtij neni, vazhdon Manjanin, përcakton se Këshilli i Ministrave përcakton rregullat për vlerësimin e pranueshmërisë për mbajtjen dhe trajtimin e propozimeve të pakërkuara, pa individualizuar.

Por manjaku i individualizimeve për të mbushur xhepat e tij, Edi Rama, njëlloj si në rastin e Bolinos, që firmosi për të plaçkitur 5 mijë metër katrorë të lënë për shkollë, i individualizon gjërat në mënyrë që të mos e diskutojë më kush pronësinë për sipërmarrjen.

Manjani i thotë se nuk mund të miratohet me personalizim. Kjo është katastrofë, ti e merr përsipër, e bën ndërmarrjen tënde pastaj,” tha lideri i opozitës duke folur mbi arsyet pse Edi Rama e firmosi me urgjencë bonusin.

“Me datën 25 nëntor, dëgjojeni pak se këtu del Veliaj, me datën 25 nëntor 2016, Lefter Koka i përgjigjet Yll Manjanit, duke i thënë në fund të shkresës: Duke ju falënderuar për bashkëpunimin, ju bëj me dije se mbetem në pritje të një komunikimi sa më të shpejtë nga ana juaj, duke qenë se për Bashkinë e Tiranës, projekti është një prej përparësive kryesore të saj.

Nuk besoj se Lefter Koka fliste në emër të sekretares së Erion Veliajt, por ai fliste në emër të Veliajt, e sigurt se vetëm në emër të atij mund të fliste ministri.

Me datë 5 dhjetor 2016, me shkresën numër 5474/15, ministri Koka ia përcjell kërkesën për miratim pa ndryshuar asgjë, sekretarit të përgjithshëm të mafies së Këshillit të Ministrave, Engjëll Agaçi, edhe pse Ministria e Drejtësisë e kishte cilësuar si të jashtëligjshme kërkesën për miratimin e bonusit për kompaninë Integrated Energy.

Me urgjencë, me datën 7 dhjetor, Këshilli i Ministrave i Edi Ramës, i cili firmosi një VKM, i paralajmëruar nga zonja Ermonela Felaj se kompania nuk ekzistonte. Firmosi një VKM në një kohë kur ishte informuar nga ministri Manjani se nuk mund të personalizohej bonusi për një kompani, nuk ishte tagër i Këshillit të Ministrave.

E kuptoni ju? Krim i dyfishtë.

Madje Lefteri nuk e ka firmosur vetë vendimin, shikoni dhelparakun. E ka firmosur kryeministri Edi Rama, duhej detyrimisht ta firmoste ministri, është me Kushtetutë, nuk duhej ta firmoste zëvendësministri.

Nuk mungon edhe firma e Don Agaçios, dhuratëmadhit, që është truri i vërtetë i plehrave.

Plehrat janë flori, kjo ishte motoja me të cilën erdhi ai në Këshillin e Ministrave.

Pra, sot unë kisha këto, në seancat tjera do ju njohim me dokumente të tjera.

Po e mbyll me vetëm kaq, aq sa mund të fusësh një minare apo një mal në thes, mund të mbulosh hajdutët Erion Veliaj dhe Edi Rama në aferën e shekullit, në vjedhjen e shekullit të djegësit të Tiranës,” tha Kryetari i Partisë Demokratike i bindur se drejtësia nuk ka kërkuar asnjë të penduar sepse e dinë se çdo i penduar i çon te Edi Rama, Erion Veliaj dhe Engjëll Agaçi.

“Cili është problemi serioz për ne?

Ne kemi dërguar vazhdimisht dokumente, dosje në SPAK dhe kemi konstatuar se ato janë arkivuar dhe nuk është bërë asnjë veprim mbi bazën e tyre, sado që kanë qenë jashtëzakonisht të rëndësishme.
Të them të vërtetën, sado që publikisht kam bërë thirrje për dëshmitarë të penduar, nuk kam asnjë siguri se këta mercenarë të ligjit dhe të drejtësisë nuk do u bëjnë gjëmën atyre që do tentojnë apo që do të dëshironin hollësisht.
Por kjo të jesh e sigurt që është reale, ai ka bërë presion, ata kanë bërë presion. Por, siç e sheh ti, aty nuk ka vullnet për t’u hetuar Erion Veliaj.
Unë jam absolutisht për zbatimin e ligjit për çdo përgjegjës. Mirëpo kur shoh që një nënpunës aty, burgoset se ka firmosur, nuk them që nuk ka shkelur ligjin, jo, kurse përdoret ky mandat kundër tij.
Se çfarë janë ato 15 mandate, tre janë të reja, 12 janë të vjetra, po pse u lëshuan ato? Ato u lëshuan për të mbuluar si mburojë Erion Veliajn, për të thënë ja 15, këta po punojnë. Aty mbulohet Erion Veliaj me këto.
Le që këta nuk kanë kërkuar asnjë të penduar se e dinë se çdo i penduar i çon te Edi Rama, Erion Veliaj, Engjëll Agaçi.
Një vajzë ka qenë kurajoze dhe e ka denoncuar vetë. Të tjerë janë aty brenda. Guxojnë ata të flasin?
Ata kanë marrë një akuzë, po është të tallësh me akuzën, të duash ti Taulant Tusha, shpërdorim detyre. Ajo është vënë si marrëveshje që ai të mos flasë për Erion Veliajn,” tha Kryetari i Partisë Demokratike, Sali Berisha, duke konstatuar në fund me keqardhje një censurë të thellë që mediat bëjnë për djegësat:

“Unë konstatoj me keqardhje shumë të thellë, një censurë të thellë që mediat bëjnë për djegësat.
Pse e tek, nuk është problemi i kësaj konference.

Prandaj që të mos keqshfrytëzojnë përgjigjet e mia, se e kanë bërë zakon që japin të gjithë problemet, përveç thelbit për të cilin unë dal në konferencë për shtyp për djegësat, këtë e kanë alergji ta japin, aplikojnë censurë.

Kjo është preferenca ime, por nuk do të thotë se nuk do përgjigjem.”