Inceneratori i Tiranës, GJKKO dënon ish-deputetin e PS-së, Alqi Bllako me 2 vjet e 8 muaj burg!
Gjykata e Posaçme për Korrupsionin dhe Krimin e Organizuar, GJKKO, ka dënuar sot ish-deputetin e Partisë Socialiste, Alqi Bllako me katër vite heqje lirie. Por, për shkak të gjykimit të shkurtuar, Bllako u dënua në mënyrë përfundimtare me 2 vite e 8 muaj burg.
GjKKO ka shpallur fajtor Ish-Sekretarin e Përgjithshëm të Ministrisë së Mjedisit, Alqi Bllako, për korrupsion pasiv të funksionarëve të lartë shtetërorë dhe të zgjedhurve vendorë. Ai është akuzuar për dy raste korrupsioni, lidhur me pagesa dhe favore që ka marrë nga kompania e Klodian Zotos, një biznesmen i njohur dhe i lidhur ngushtë me politikën.
Në çështjen e parë, Alqi Bllako është shpallur fajtor për një pagesë prej 120 mijë eurosh nga kompania e Klodian Zotos, e cila kishte lidhje me fabrikën e birrës së babait të ish-deputetit të Partisë Socialiste.
Në çështjen e dytë, Alqi Bllako është akuzuar për ndikim në punësimin e Klodian Zotos si këshilltar i jashtëm për Vladimir Bezhanin, një tjetër funksionar i lartë, duke abuzuar me detyrën e tij.
Prokuroria e Posaçme AntiKorrupsion ka kërkuar një dënim për ish-deputetin e PS, Alqi Bllako, me 5 vite burg, si dhe 5 vite qëndrim jashtë të gjitha funksioneve publike.
Ndryshe, Alqi Bllako është dënuar më herët me vendim të formës së prerë për inceneratorin e Elbasanit me 2 vite e 8 muaj, ndërsa për inceneratorin e Fierit, çështja u rikthye për rigjykim nga Apeli në Shkallën e Parë.
