Inceneratori i Tiranës, GJKKO pranon gjykimin e shkurtuar për Alqi Bllakon
Pasi ka kërkuar të gjykohet me procedurën e gjykimit të shkurtuar, sot ka nisur procesi gjyqësor në themel për Ish-Deputetin e PS, Alqi Bllako, lidhur me çështjen e inceneratorit të Tiranës.
SPAK ka paraqitur në mënyrë të përmbledhur provat dhe faktet që disponon lidhur me çështjen e inceneratorit të Tiranës, duke dhënë edhe argumentet përse kërkon dënimin e Alqi Bllakos.
Pas shqyrtimit, Gjykata e Posaçme vendosi që të pranojë kërkesën e Alqi Bllakos për gjykim të shkurtuar. Kërkesa është bërë në seancë paraprake dhe po i njëjta kërkesë u bë nga Bllako edhe ditën e sotme në sallën e gjyqit. Gjykata ftoi palët për konkluzionet përfundimtare.
SPAK kërkoi kohë që të bëjë gati pretencën për Alqi Bllakon, kështu seanca e radhës do të mbahet në datë 29 janar ora 10:00. Po në këtë seancë do të jepen edhe argumentet e mbrojtjes duke qenë se janë më gjykim të shkurtuar dhe provat u janë vënë në dispozicion palëve.
Gjatë hetimeve janë konstatuar veprime të kundraligjshme të kryera nga i pandehuri, në kohën kur ishte sekretar i përgjithshëm i Ministrisë së Mjedisit. Dyshohet se ka përfituar para në vlerën e rreth 120 mijë euro dhe 7 milionë e 520 mijë lekë nga Vladimir Bezhani, nga shoqëria koncesionare për ndërtimin e inceneratorit. Bllako i ka propozuar Bezhanit të ofronte konsulencë juridike për çështjen e inceneratorit të Tiranës, para se të bëhej propozimi i pakërkuar lidhur me këtë çështje.
Bllako i ka kërkuar Klodian Zotos që ta punësojë, ndërkohë që Bezhani ishte këshilltar i jashtëm i ministrit Koka, edhe pse paguhej nga shoqëria “Integrated Technology Services” sh.p.k. 37 fashikuj janë paraqitur nga SPAK për çështjen e Alqi Bllakos.
Ndryshe, Alqi Bllako llako akuzohet për korrupsion pasiv në dy raste. Pas miratimit të kërkesës për gjykim të shkurtuar nga GJKKO, nëse shpallet fajtor, Alqi Bllakos i ulet 1/3 e dënimit.
