Incenerimi i kanabizimit “Edi Rama”
nga Agim Popoci
Gjurma e parë që la Edi Rama me ardhjen në pushtet ishte kanabizimi i gjithë Shqipërisë; Dhe, pas shumë vite bashkëjetese me kultivimin dhe trafikimin e drogës, ndonëse e theu në mes Lazaratin, si rrufe në qiell të hapur shqiptarët e shohin ministrin më të suksesshëm të Edi Ramës, që bëri zap policinë në shërbim të mbjelljes së kanabisit, Saimir Tahirin, në pranga!
Lideri i opozitës nxitoi të shprehë kënaqësinë me dënimin prej 3.4 viteve burg për njeriun që nuk la cep të Shqipërisë pa mbjellë kanabis dhe nuk la bursë droge pa tronditur me çmimin që uli dhe cilësinë e drogës, që po favorizohej nga klima mesdhetare dhe erërat e bregut të detit!
Mileti u kënaq por nuk kishte perde në sy, e kuptoi që Edi Rama po tallej si me ta ashtu dhe Reformën në Drejtësi. Ustallarët e komunikimit masiv nxituan të flasin për një bashkëqeverisje zyrtare me PD-në e Lulzim Bashës, si domosdoshmëri e një këndellje të qeverisjes për ta bërë luftën kundër të keqes që kishte prekur vendin edhe luftë kombëtare.
Po, si të harrohej mbjellja e trafiku i drogës si dhe paraja lum që ishte futur në xhepat e bashkëpunëtorëve të Edi Ramës, që ishte dhe pengesa më e madhe për bashkëqeverisje që mund të shihej me dyshim nga opinioni publik.
Kështu, plasi skandali me incineratorët, u quajt më i madhi 30 viteve dhe u folë për 430 milionë euro duke aktivizuar dhe Prokurorinë e Posaçme, SPAK, si produkt i Reformës në Drejtësi e cila filloi me arrestime; Dhe, figura më e madhe të cilës i vuri prangat ishte njeriu që denoncoi mbjelljen dhe trafikun e kanabisit nga drejtori i policisë Durrës, ish-ministri i Mjedisit, Lefter Koka!
Por, dora e politikës nuk mbaroi punë me turbullirat e opinionit publik por shpiku Komisionin Hetimor duke filluar një proces paralel me SPAK-un me të cilin tejkaloi përmasat e çdo show mediatik që është mbajtur ndonjëherë në Shqipëri! Madje edhe atij që “hetoi” Kryetarin e Bashkisë Tiranë, Edi Rama, dhe ky i fundit përgjigjej me këngën që u bë dhe himni i vjedhjes shqiptare: Qingji vogël rri mendueshëm…
Shifra prej 430 milionë eurove si më e madhja ndonjëherë, ishte e para me të cilën u manipulua opinioni pastaj dhe protagonistët e kësaj vjedhje që parakaluan deri në bankën e të akuzuarve të shoqëruar me britmat e Komisionit Hetimor ndërsa iu dha mundësia të sillen si të çmendur, si kryebashkiakja e Durrësit që iku dhe nga Komisioni, akrobat si Erion Veliaj që degjeneroi gjithë zinxhirin komandues të Lulzim Bashës ose si “Kumbara”, që e luajti jashtëzakonisht mirë Sekretari i Përgjithshëm i Kryeministrit, Engjëll Agaçi.
Në fund të ditës së djeshme, kur incenerimit të kujtesës së shqiptarëve rreth kanabizimit të Shqipërisë po i vinte fundi, vetë i zoti i punës, Kryeministri Edi Rama paralajmëroi se sot do të shfaqet në Komisionin Hetimor për Inceneratorët, madje mezi e priste!
Po, 430 milionë euro janë shumë për Shqipërinë e varfër, dhe me këtë po merreth tashmë SPAK-u!
Por, me kanabizimin e Shqipërisë, që 430 milionë euro nuk janë hiç gjë ose vetëm 358 hektarë me kanabis, nëse përllogaritet prodhimi minimal me 1.5 ton/hektar, nuk po merret askush.
Dhe jo vetëm kaq! Me dënimin 3.4 vite burg të Saimir Tahirit, kanabizimi mund të quhet edhe çështje e mbyllur pavarësisht se Shqipëria vazhdon të kondierohet si një nga qendrat e kanabisit dhe kokainës cilësore!
Sot, ato që thotë Edi Rama do të dëgjohen shumë më shumë se sa kur gërthiste si i çmendur me megafon në Komisionin Hetimor kur ishte Kryetar i Bashkisë Tiranë, jo pse e kaluara e tij sot mund të quhet e ndritur por sepse tani po i shërbejnë njerëzit nga Ambsada më e zëshme!
Sot pavarësisht se çfarë thotë Kryeministri para Komisionit Hetimor, me dhënien fund të incenerimit të kanabizimit “Edi Rama” dhe djegies së disa bashkëpunëtorëve tjerë të Edi Ramës për të ruajtur pushtetin, shpërqendrimi i vëmendjes do ti hap rrugë dhe bashkëqeverisjes zyrtare të cilën, tashmë Kunati mezi po e pret!
