Incident në Ambasadën e SHBA në Mal të Zi

Ambasada e Shteteve të Bashkuara në Podgoricë e ka konfirmuar për RFE se një person ka tentuar të hyjë në oborrin e ambasadës dhe se policia malazeze ka reaguar menjëherë.

“Sot rreth orës 10:45 një person ka bërë përpjekje të hyjë në oborrin e ambasadës së SHBA-së në Podgoricë. Pjesëtarët e sigurimit kanë reaguar menjëherë duke e ndaluar dhe dorëzuar te autoritetet e policisë së Malit të Zi. Falenderojmë partnerët tanë të Malit të Zi për ndihmën dhe përkrahjen,” thuhet në përgjigjen e Ambasadës amerikane në Podgoricë.

Pas këtij incidenti, pjesëtarët e policisë speciale kanë bllokuar edhe rrugën përreth ambasadës.

Gazeta “Vijesti” ka raportuar se sigurimi i Ambasadës së SHBA-ve ka reaguar pasi një grup i azilkërkuesve kanë bërë përpjekje të hyjnë në objekt.