Indeksi i biznesit AmCham, Basha: Pasqyrë se si korrupsioni po gërryen ekonominë, largon investitorët e varfëron shqiptarët!

Duke shprehur shqetësim pas publikimit të Indeksit të besimit të Dhomës Amerikane të Tregtisë, AmCham për vitin 2019, ku regjistrohet rënia më e madhe e ekonomisë në 8 vitet e fundit, Kryetari i Partisë Demokratike, Lulzim Basha tha se ky Raport është një pasqyrë e situatës ekonomike dhe e korrupsionit që po gërryen ekonominë, po largon investitorët, po mbyll vende pune e varfëron shqiptarët.

“Konkurrenca e padrejtë, performanca zhgënjyese e ekonomisë, klima e përgjithshme e keqe për biznesin, niveli i lartë i korrupsionit, ekonomia joformale, burokracia, niveli i lartë i taksave dhe vetë qeveria me politikat e saj klienteliste janë pengesat më të mëdha për të bërë biznes në Shqipëri,” tha Lulzim Basha duke shtuar se pasi ka dëgjuar shqetësimet e përfaqësuesve të Dhomës Amerikane, dhomave të tjera të tregtisë dhe industrisë, të biznesit të vogël etj, e ka të qartë se biznesi ka nevojë urgjente për ndryshim të kësaj situate, për zgjidhje që garantojnë konkurrencë të ndershme, lehtësi fiskale dhe përmirësim të klimës së të bërit biznes.

Bazuar mbi këto nevoja, thekson Kryetari i Partisë Demokratike, kanë hartuar një platformë ekonomike në të cilën parashikohet: Taksa e sheshtë 9%, eleminimi dhe thjeshtëzimi i lejeve dhe licencave, eliminimi dhe bashkimi i 18 taksave për të rimoduluar sistemin tonë fiskal.

Njëkohësisht, plani i PD parasheh dhe ristrukturimin e agjencive dhe institucioneve doganore, fiskale dhe të regjistrimeve. Më thjeshtë dhe më lehtë për të gjithë, thekson Kryetari i Partisë Demokratike, Lulzim Basha duke bërë të qartë në fund edhe prioritetet:

“Punësimi dhe zhvillimi ekonomik janë prioritetet kryesore dhe për ta arritur këtë ne do ta bëjmë Shqipërinë vend tërheqës për investimet e huaja, do të fuqizojmë biznesin vendas dhe do të reduktojmë hapësirat për abuzim dhe korrupsion që sot po i marrin frymën biznesit në Shqipëri.”