INSTAT: Të dhënat e Censit do të publikohen në qershor

Të dhënat e Censit do të publikohen në qershor të këtij viti, deklaroi drejtoresha e INSTAT, Elsa Dhuli, në një dalje për mediat.

“Të dhënat e Censit do të jenë gati për publikim në qershor 2024. Të dhënat do përmbajnë informacione të detajuara mbi demografinë, ekonominë, arsimin, shëndetësinë, duke ofruar statistika të nevojshme  për grupet e përdoruesve.

Rezultatet e Censit do të ofrojnë bazën e fortë për planifikimin e politikave publike dhe do ndihmojnë në zhvillimin e programeve për përmirësimin e jetesës së qytetarëve. Gjithashtu ato do të kontribuojmë në përmirësimin e infrastrukturës, si dhe do të ndihmojnë në monitorimin e progresit të vendit në arritjen e objektivave të zhvillimit të qëndrueshëm”.

Qytetarët që kanë refuzuar të plotësojnë pyetësorin kanë marrë gjoba, deklaroi Dhuli, por nuk specifikoi sa është numri i refuzimit.

“Për një numër të saktë nuk mund ta them, kemi pasur raste të refuzimeve, në nivele minimaliste. krahasuar me vitet e mëparshme janë të vogla pasi ka qenë fushatë ndërgjegjësimi e madhe.

Madje, kemi pasur raste të shumta në numër ku qytetarët kërkonin të bëheshin pjesë. Lidhur me gjobat, duhet ta analizojmë procesin, pastaj mund të fillojmë me procese të mëtejshme”./Monitor/