Instituti ekonomik gjerman: Treguesit, Gjermania është në recesion!

Pritshmëria e liderëve ekonomik gjerman është përkeqësuar dukshëm në muajin gusht, duke arritur nivelin më të ulët që nga nëntori i vitit 2012 nën ndikimin e përshkallëzimit të konflikteve tregtare që po e çojnë ekonominë më të madhe evropiane drejtë recesionit, dëshmon hulumtimi i publikuar nga Instituti Ekonomik, Ifo.

Indeksi i klimës së biznesit i cili përpunohet nga Instituti Ekonomik, Ifo, ka rënë në muajin gusht në 94.3 pikë, me rishikimin e atij të muajit korrik që ishte 95.8 pikë.

Vlera e tij po bie për pesë muaj rresht.

“Gjithnjë e më shumë tregues çojnë drejtë konstatimit se Gjermania është në recesion,” konstaton Presidenti i Ifo, Clemens Fuest.

“Kompanitë janë shumë më pak të kënaqura me situatën aktuale të biznesit ndërsa pesimizmi i tyre është rritur edhe më shumë sa i përket muajve që po vijnë,” tha Fuest duke rikujtuar:

“Herën e kaluar kompanitë e sektorit industrial  kanë demonstruar një pesimizëm si në vitin e krizës 2009.”

Kompanitë industriale gjermane të orientuara në eksport kanë probleme me kërkesën gjithnjë e më të dobët, konflikteve tregtare për të cilat akuzojnë presidentin Donald Trump si shkaktar me politikën “America First” si dhe paparashikueshmërinë që ndërlidhet me Brexit.

Studimi i Ifo-s ndërlidhet me raportin e javës së kaluar të kompanisë londineze Markit, që tregonte nivelin e ulët të aktivitetit në ekonominë gjermane, me rënien e aktivitetit industri dhe stanjacionin e sektorit të shërbimeve.

Ekonomia gjermane në periudhën prill-qershor ka rënë për 0.1 për qind në krahasim me tre muajt e kaluar ndërkohë Banka Qendrore është shprehur se aktivitetet janë ulur për shkak të muajve të verës. Nëse vlerësimet e Bankës Qendrore dalin të sakta, sipas ekonomistëve, Gjermania do të jetë në recesion për shkak të rënies së aktivitetit në nivel tremujori, të dy tremujorëve të fundit me radhë.