Integriteti zgjedhor, Zv/Ambasadori SHBA: Problem, shitblerja e votës dhe keqpërdorimi i të dhënave!

Zgjedhjet e lira nuk është vetëm përgjegjësi e qeverisë, tha sot Zv/Ambasador i SHBA në Tiranë, Demian Smith, duke shtuar kjo i takon dhe partive politike dhe votuesve ndërsa theksoi se shitblerja e votës dhe keqpërdorimi i të dhënave ishte problem në zgjedhjet e kaluara.

“Zgjedhje të lirë e të ndershme në përputhje me standardet zgjedhore të Shqipërisë, kjo është jo vetëm përgjegjësi e qeverisë dhe partive politike, por edhe e votuesve. Pas zgjedhjeve të prillit 2021 mbajtëm shënim vërejtjet e OSBE-ODIHR, ku kishte jo vetëm aspekte të mira, por edhe shit-blerje të votave apo keqpërdorim të të dhënave personale,” tha Zv/Ambasadori amerikan Demian Smith duke vazhduar të inkurajojë institucionet shtetërore, partitë politike, që të vënë në zbatim rekomandimet e OSBE-ODIHR, ndërsa përfundoi:

“Duhet që partitë politike të shikojnë kandidatët e tyre, nëse janë sipas ligjit dhe janë të pastër. Kjo është e rëndësishme për votuesit, në cilëndo demokraci. Strategjia e presidentit Biden për luftën ndaj korrupsionit vë në pah rrezikun që përbën korrupsioni për shoqërinë. Ju e keni autoritetin dhe përgjegjësinë për të vazhduar përmirësimin e proceseve zgjedhore të Shqipërisë dhe për ta mbajtur Shqipërinë në këtë shteg mbresëlënës demokratik.”