Intelegjenca e Bosnjes ngre alarmin për praninë e pjesëtarëve të Wagner dhe Ujqve të Natës
Të dhënat e inteligjencës boshnjake tregojnë se anëtarët e grupit mercenar rus “Wagner”, pjesëtarë të “Lëvizjes Çetnike” dhe anëtarët e klubit rus të motoçikletave “Ujqit e Natës” do të marrin pjesë sot në festimin e Ditës së Republikës Srpska të Bosnje Hercegovinës.
Këtë e ka konfirmuar për RFE, ministri i Sigurisë së Bosnje Hercegovinës, Selmo Cikotiç, duke theksuar se bëhet fjalë për të dhëna nga strukturat e inteligjencës dhe sigurisë.
“Këto janë grupe pak a shumë ekstreme dhe radikale, të cilat janë prezent në këtë zonë prej kohësh dhe presim që të jenë aty më 9 janar. Me sa di unë, asnjëri prej tyre nuk e ka bërë të ditur këtë zyrtarisht,” tha Cikotiç.
Në Republikën Srpska, një entitet në Bosnje Hercegovinë, sot festohet si Dita e Republikës Srpska edhe pse Gjykata Kushtetuese e Bosnje Hercegovinës e ka shpallur atë datë jokushtetuese në dy raste.
Festimi qendror me një paradë formale do të mbahet në lindje të Sarajevës, ndryshe nga vitet e kaluara kur 9 janari u festua në Banjallukë.
Të premten, më 6 janar, Cikotiç i dërgoi një letër komandantit të EUFOR-it në Bosnje Hercegovinë, Anton Wessely, në të cilën ai paralajmëron kërcënimet e sigurisë në lidhje me përkujtimin e 9 janarit në zonën e Sarajevës.
Në letër, ai deklaroi se informacioni i disponueshëm nga strukturat e inteligjencës dhe sigurisë tregonte “prani të mundshme të disa grupeve radikale dhe ekstremiste nga entiteti i Republikës Srpska, Serbisë dhe Rusisë”.
Ai ka kujtuar edhe reagimet e shoqatave të veteranëve në kantonin e Sarajevës, të cilët e konsiderojnë këtë ngjarje të papranueshme, duke qenë se festimi i kësaj date është shpallur jokushtetues.
Cikotiç tha se ai pret që “EUFOR të marrë masa për të siguruar funksionimin ligjor dhe kushtetues të të gjitha institucioneve, si dhe paqen dhe sigurinë në Bosnje Hercegovinë”, thuhet në deklaratë.
“Kam paralajmëruar për praninë e tyre sepse besoj se është më mirë të parandalohet, e ndoshta të mos u lëmë disa organizatave qytetare që të vendosin rendin. EUFOR-i ka rritur monitorimin e situatës në atë zonë”, theksoi ai.
Autoritetet e Republikës Srpska festojnë 9 janarin, datën kur në Sarajevë në vitin 1992 Parlamenti i i Popullit Serb, miratoi Deklaratën për Shpalljen e Republikës së Popullit Serb të Bosnje Hercegovinës si entitet i pavarur brenda Bosnje Hercegovinës.
Qëllimi, raporton RFE, ishte që ajo pjesë e Bosnje Hercegovinës t’i aneksohej Jugosllavisë, e cila në atë kohë po shpërbëhej.
