Investime pa u menduar, Avokatja e Popullit: Gjendja në Komisariatet e Tiranës, katastrofike!
Duke raportuar për vitin 2021 para Komisionit për Çështjet Ligjore, Administratën Publike dhe të Drejtat e Njeriut, Avokatja e Popullit, Erinda Ballanca, foli për mungesë të kushteve në Komisariatet e Policisë, investimet e pa menduara që janë bërë dhe në veçanti kushteve katastrofike në Komisariatet e Tiranës.
Erinda Ballanca foli dhe për bllokun e sigurisë që është ndërtuar në Tiranë, që sipas Avokates së Popullit nuk është marrë në dorëzim nga Drejtori i Përgjithshëm i Policisë, Gledis Nano, për shkak se nuk përmbush kushtet e sigurisë.
“Sa i përket gjendjes në komisariatet e Tiranës, në mënyrë të veçantë është katastrofike, tërësisht në kundërshtim me standardet për qëndrimin e personave të privuar nga liria. Kemi pasur raport për dhoma të mbyllura, dhe kur ne kemi shkuar për inspektim i kemi gjetur të hapura.Futeshin brenda në komisariate, persona me zero kushte, për shkak se kishin protestuar në shkelje të rregullave anticovid. Ndërkohë në ato komisariate nuk ka pasur asnjë kusht, prej 3 vitesh në Tiranë po ndërtohet një bllok i dhomave të sigurisë, me një kapacitet tjetër, dhe me kushte të tjera,” tha Avokatja e Popullit, Erinda Ballanca, duke shtuar se aty është bërë një investim pa menduar.
“Ky boks i ri nuk ka elementë sigurie në përputhje me ligjin, me të drejtë drejtori i policisë, kur ka shkuar për të marrë në dorëzim objektin, ka refuzuar, sepse nuk ka elementë të sigurisë. Kemi 7 muaj që qytetarët jetojnë në kushte skandaloze, për shkak se personi që duhet të kishte parë elementët e sigurisë, nuk e ka bërë detyrën e tij.
Kemi kërkuar ndjekje penale, lekët hidhen, dhe investimi në rastin konkret nuk po çon aty ku duhet të çonte, është një problem jo i vogël për Tiranën. Diku do të shkojnë këta njerëz, në rastin e Kamzës psh, drejtori i komisariatit ka thënë ‘ku ti çoj?, jam i detyruar’. Pra në fund të ditës problemi thelbësor që mbetet është se investimi që u bë. Unë kam bërë takim dhe me zotin Nano për këtë çështje.”
Kritikave të Avokates së Popullit, deputetët e mazhorancës në Komisionin për Çështjet Ligjore, Administratën Publike dhe të Drejtat e Njeriut iu përgjigjen me kritika në punën e këtij institucioni që raportonte për vitin 2021, duke i folur për interesin që ajo ka shfaqur gjatë protestave të opozitës në vitin 2019, madje Ermonela Felaj i dha të drejtë vetes t’i kujtoj Ballancës se ajo është zgjedhë falë Marrëveshjes së 17 Majit 2017, gjë që nuk mbeti pa u sqaruar se Marrëveshja është bërë për Avokatin e Popullit dhe jo Erinda Ballancës.
