Investimet e huaja, Orban në Tiranë: Paratë nuk mbajnë erë, por ai që i ka po!

Është e papranueshme dhe e turpshme se sa ngadalë po ecën procesi i zgjerimit të Bashkimit Evropian, vazhdoi me kritikat ndaj BE edhe gjatë vizitës në Tiranë, Kryeministri i Hungarisë, Viktor Orban ku zhvilloi takim me Kryeministrin Edi Rama, ku shprehu mbështetjen si gjithmonë për Shqipërinë ndërsa komentoi dhe investimet duke folur për vuajtjet e Hungarisë nga investitorë që nuk e respektojnë vendin.

“Nuk jam në gjendje të përmend një vend Europian që ka rezerva në rritje. Rezervat e rritjes janë në Ballkan. Vitet e fundit Europa po pëson një rënie ekonomike dhe kjo mund të parandalohet nëse bashkohemi të gjithë. Është e papranueshme dhe e turpshme se sa ngadalë po ecën procesi i zgjerimit të BE.

Shqipëria ka duruar 13 vite për të arritur deri në fillimin e negociatave. Mendoj se vetëm Gjermania do të ngelet në 10 vendet e zhvilluara të botës. Nëse BE do të ecë me këtë ritëm të ngadalë që do të jetë vetëvrasës, nuk  e di si do t’ja bëjë Europa në të ardhmen. Ne mbështesim integrimin e Shqipërisë.

Para siç thonin romakët e lashtë paraja nuk mban erë, po i zoti i atyre parave mban erë. Pra mund të ketë edhe investitorë që nuk e respektojnë vendin dhe ne kemi pasur. Kemi vuajtur nga kjo sjellje. Dhe besoj se firmat hungareze që sillen në Shqipëri do të jenë respektuese ndaj këtij vendi. Firmat, ndërmarrjet hungareze që do të vijnë në Shqipëri nuk do të sillen kurrë në këtë mënyrë. Do të jenë gjithmonë respektuese ndaj vendit, ndaj ligjit, nevojave të këtij vendi. Do t’ju falënderoja shumë për mundësinë që na jepni për bashkëpunim, pavarësisht se jemi ne që sjellim kapitalin,” tha Viktor Orban, duke përfunduar:

“Mendoj se çështja nuk është e thjesht për t’u theksuar. Nuk kemi një bindje të palëkundshme që zgjerimi i BE është i pashmangshëm. Nuk duhet të ulemi dhe të presim, por duhet punuar për këtë. Jemi të përkushtuar që Shqipëria të anëtarësohet në BE. Shqipëria duhet të nxitojë të anëtarësohet. I kam mbështetur iniciativat që ka bërë Ram në të kaluarën dhe ato që do të bëjë në të ardhmen. Të gjitha ato koezione që arrijnë nga Europa në Shqipëri apo Hungari, të arrijë në atë nivel që mos të presim formalizimin e anëtarësimit, por të vijojmë atë punë për Shqipërinë”.

Nga ana tjetër, Kryeministri Edi Rama foli për praninë e investitorëve hungarezë në Shqipëri.

“Kemi dy realitete shumë domethënëse. Kemi realitetin e investimit në telekomunikacion nga kompania 4IG e cila jo vetëm që ka ardhur në Shqipëri si një ofruese cilësore e një shërbimi që sot është kaq i lidhur me jetën e përditshme të qytetarëve, por po bën në Shqipëri një ristrukturim aq shumë të pritur dhe të nevojshëm të të gjithë tregut të telekomunikacionit me krijimin e një kompanie që është fryt i bashkëpunimit të dy kompanive të tjera që do të përmirësojë ofertën, do ta shëndoshë tregun dhe patjetër që do të sjellë dhe impakt të rëndësishëm në ekonomi. Realiteti tjetër është sektori bankar.”

Ndryshe, Kryeministri i Hungarisë, Viktor Orban, ndodhet në Shqipëri në një vizitë zyrtare i shoqëruar nga ministri i Punëve të Jashtme dhe Tregtisë, Peter Szillarto dhe ministri i Zhvillimit Ekonomik, Marton Nagy.