“Investimi” i sekuestron 1.5 milionë euro, Ish-Drejtori i ALUIZNI-t: Paratë janë siguruar nga…

Llogaritë bankare me vlerë 1.5 milionë euro të Ish-Drejtorit të Agjencisë së Legalizimit, Urbanizimit dhe Integrimit të Zonave Urbane të Tiranës, Ferdinand Shehu, janë sekuestruar gjatë një operacioni të koduar “Investimi”

Dyshohet se kjo shumë është përfituar nga burime të paligjshme.

“Në vijim të punës për gjurmimin, evidentimin dhe sekuestrimin e pasurive të paluajtshme dhe të shumave financiare, që dyshohet se janë përfituar nga burime të paligjshme, Drejtoria për Hetimin e Krimeve Ekonomike e Financiare në Departamentin e Policisë Kriminale, në bashkëpunim me Seksionin për Hetimin e Pastrimit të Parave, në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësor Tiranë, finalizoi operacionin policor të koduar “Investimi”, për sekuestrimin e 1 500 000 euro llogari bankare, të një shtetasi, ish-punonjës i administratës shtetërore i cili në vitet 2006 – 2011 ka mbajtur funksione zyrtare në Agjencinë e Legalizimit, Urbanizimit dhe Integrimit të Zonave Urbane”njofton sot policia e shtetit.

Ky shtetas, thekson policia, dyshohet se ka konsumuar veprën penale “Pastrimi i produkteve të veprës penale”, parashikuar nga neni 287 i Kodit Penal, duke kryer disa investime në pasuritë e paluajtshme.

Kohët e fundit, nëpërmjet një banke private, Shehu ka tentuar transferimin e 1 milionë eurove jashtë vendit, me justifikimin për investime financiare, ndërkohë 500 000 Euro të tjera i ka vendosur në depozitë me afat, ka saqruar policia dhe për arsye se hetimet janë në vijim, policia nuk jep të dhëna të tjera për momentin.

Shehu: 1.5 milionë eurot nga shitja e një hoteli 

Pas sekustrimit të parave ka reaguar vetë Ish-Drejtori i ALUIZNI-t të Tiranës, Ferdinand Shehu, duk ei quajtur të pavërteta deklarimet e policisë se shuma prej 1. 5 milionë euro është përfituar nga burime të paligjshme.

“1.5 milionë eurot e sekuestruara janë të ardhura të siguruara nga shitja e një hoteli,” thotë për OraNews, Shehu, duke shtuar se ndodhet në Itali e transaksioni që po kryhej, sipas tij, ishte në përputhje me ligjet shqiptare:

“Aktualisht ndodhem në Itali, nuk kam asgjë për të fshehur, do të kthehem në Shqipëri. Transaksioni që po kryeja ishte në përputhje me ligjet shqiptare, në rrugë bankare dhe noter. Do të ndjek të gjitha rrugët ligjore për të cilën nga ky moment është ngarkuar avokatja ime.Do të ndjek të gjitha rrugët ligjore për të cilën nga ky moment është ngarkuar avokatja ime,” tha ai.

Ndryshe, Ferdinand Shehu në periudhën 2006-2010 ishte Zv/Drejtor i Përgjithshëm pranë Agjencisë së Legalizimit, Urbanizimit dhe Integrimit të Zonave/Ndërtimeve Informale, ALUIZNI, ndërsa në vitin 2010 u emërua Drejtori i ALUIZNI-t të Tiranës pos nga i cili u shkarkua në vitin 2011 me motivacionin se kishte fshehur të shkuarën e tij si “Hetues” në kohën e diktaturës.

Së fundi, Ferdinand Shehu ishte pjesë e Këshillit Bashkiak të Tiranës si përfaqësues i Lëvizjes për Zhvillim Kombëtar të Dashamir Shehit, nga zgjedhjet e vitit 2015.