Irani e pranoi, ne e kemi rrëzuar avionin ku u vranë 176 njerëz
Irani më në fund e pranoi se pa qëllim, ishte gabim njerëzor, ka rrëzuar avionin e Ukrainës ku mbetën të vrarë 176 njerëz. Fillimisht Teherani zyrtar i hodhi poshtë akuzat se forcat iraniane kishin rrëzuar avionin pas sulmeve raketore iraniane ndaj bazave amerikane.
“Gabim njerëzor”
Shefi i diplomacisë iraniane, Mohamad Javad Zarif tha përmes rrjetit social Twitter se hetimet në kuadër të forcave të armatosura ka treguar se rrëzimi i avionit ukrainas Boeing 737-800 ka ardhë për shkak të “gabimit njerëzor në momentin e krizës së shkaktuar nga aventurizmi amerikan i cili shkaktoi katastrofën”
Në komunikatën e ushtrisë iraniane, ku thuhet se avioni është goditur me raketë shprehet ngushëllimi për familjet e viktimave, dhe evidentohet se avioni ka fluturuar shumë afër zonës së ndjeshme ushtarake që i përket Gardës elite revolucionare.
“Përgjegjësit para ligjit”
Palët përgjegjëse, thekson ushtria iraniane, do të përgjigjen para instancave gjyqësore ushtarake duke u ngarkuar me fajin.
Pamjet filmike me celular që pas rrëzimit të avionit janë bërë nga iranian të thjeshtë dhe vazhdojnë të qarkullojnë nëpër rrjetin social Twitter tregojnë se rrëzimi i avionit u shoqërua me një shpërthim.
Të enjten, Irani tha se do të kontrolloj të dhënat nga dy kutitë e zeza në mënyrë që të vërtetoj se çfarë ka ndodhur edhe pse vetë deklaruan ndërsa e mohonin mundësinë e goditjes me raketë iraniane, se kjo mund të zgjas një deri në dy vjet.
Edhe Presidenti i Iranit shprehë keqardhje
Pas retorikës kriminale kundër SHBA dhe Presidentit Trump, sot bota arriti të shoh se edhe Presidenti i Iranit mund të shprehë keqardhje për jetë të humbura njerëzish. Hasan Rouhanin duke theksuar se vendi i tij shpreh “keqardhje të thellë” që është rrëzuar avioni ukrainas dhe se “ka ndodhur një tragjedi e madhe dhe gabim i pafalshëm”.
“Hetimi i brendshëm i forcave të armatosura ka ardhur në përfundimin se për fat të keq, gabimisht është gjuajtur me një raketë e cila ka shkaktuar rrëzimin e avionit ukrainas dhe vdekjen e 176 njerëzve të pafajshëm”, tha Rouhani përmes rrjetit social Twitter duke shtuar se “hetimi vazhdon në mënyrë që përgjegjësitë të dalin para ligjit.
Ndryshe, rrëzimi i avionit i cili ndodhi të mërkurën ka rritur presionet ndërkombëtare mbi Iranin pas disa muaj tensionesh me SHBA dhe sulmeve të ndërsjella. Shtetet e Bashkuara dhe Kanadaja, 57 shtetasit e së cilës humbën jetën me rrëzimin e avionit, kanë fajësuar Iranin për rrëzimin e avionit duke theksuar se rrëzimi nuk ishte i qëllimshëm.
