Irani godet baza dhe ambasada amerikane, SHBA paralajmëron sulme më të ashpra

Sekretari amerikan i Shtetit, Marco Rubio, paralajmëroi goditje më të rënda ndaj Iranit, duke theksuar se nuk do të bëjë publike “detajet e veprimeve taktike. Në kundërpërgjigje, Irani vazhdon sulmet ndaj objektivave amerikane në rajon. Së fundmi, ambasada amerikane në Riad u godit nga dy dronë, duke pësuar dëme të kufizuara materiale.

Departamenti amerikan i Shtetit u bëri thirrje qytetarëve amerikanë në pjesën më të madhe të Lindjes së Mesme që të largohen nga rajoni me mjete komerciale, për shkak të “rreziqeve serioze të sigurisë”.

Këshilla vlen për shtetasit amerikanë në Bahrejn, Egjipt, Iran, Irak, Izrael, Bregun Perëndimor, Gazë, Jordani, Kuvajt, Liban, Oman, Katar, Arabinë Saudite, Siri, Emiratet e Bashkuara Arabe dhe Jemen.

Më herët, sekretari amerikan i Shtetit, Marco Rubio, deklaroi se “goditjet më të forta” ndaj Iranit “ende nuk kanë ndodhur”, por shtoi se nuk do të “zbulojë detajet e përpjekjeve taktike”.

Deklarata erdhi pasi presidenti amerikan, Donald Trump, tha se mori vendimin për të nisur luftë kundër Iranit, sepse ishte “mundësia e fundit dhe më e mirë” për të ndalur regjimin iranian.

Mëngjesin e sotëm Presidenti Trump paralajmërsoi përmes rrjetit social Truth se Shtetet e Bashkuara kanë një rezervë rekord municionesh me rreze të mesme dhe të lartë.

“Luftërat mund të zhvillohen përgjithmonë dhe me shumë sukses duke përdorur vetëm këto rezerva,” tha Presidenti Trump ndërsa akuzoi Joe Biden se ka shpenzuar qindra miliarda dollarë nga paratë amerikane duke i dhënë Ukrainës armë të nivelit të lartë pa i rimbushur rezervat.

Me këtë rast ai tha se e rindërtoi ushtrinë gjatë mandatit të tij të parë dhe vazhdon ta bëjë këtë ndërsa përfundoi:

“Shtetet e Bashkuara janë të pajisura mirë dhe gati për të fituar një FITORE TË MADHE!”

Ndërkohë Forcat Mbrojtëse të Izraelit konfirmuan se kanë nisur sulme në kryeqytetin iranian, Teheran, si dhe në kryeqytetin libanez, Bejrut.

“Ushtria po kryen sulme të njëkohshme kundër objektivave ushtarake në Teheran dhe Bejrut”, tha ajo përmes një deklarate.

Sulmet vijnë rreth një orë pasi ushtria izraelite lëshoi një “paralajmërim urgjent” për njerëzit në periferitë jugore të Bejrutit dhe në dhjetëra fshatra, duke u bërë thirrje atyre që të evakuohen.

Ushtria tha se ka në shënjestër qendrat e komandës dhe objektet e magazinimit që i përkasin Hezbollahut – grup militant i lidhur me Iranin.

Ushtria izraelite tha se “sulmoi dhe çmontoi” selinë e radios dhe televizionit shtetëror në Teheran, të cilën e cilësoi si “qendër të komunikimit të regjimit terrorist”.

“Gjatë viteve, Autoriteti Iranian i Transmetimeve bëri thirrje për shkatërrimin e shtetit të Izraelit dhe për përdorimin e armëve bërthamore”, tha ushtria izraelite përmes një deklarate.

“Qendra u përdor nga forcat e regjimit iranian edhe për të çuar përpara aktivitetet ushtarake, nën maskën e aktivitetit civil”, shtoi ajo.

Komanda Qendrore e SHBA-së, Centcom, tha se gjatë operacioneve të vazhdueshme në Iran, forcat amerikane kanë shkatërruar objektet e komandës dhe kontrollit të Gardës Revolucionare Islamike, IRGC, kapacitetet e mbrojtjes ajrore iraniane, vendet e lëshimit të raketave dhe dronëve, si dhe aeroportet ushtarake.

“Ne do të vazhdojmë të ndërmarrim veprime kundër kërcënimeve të menjëhershme që vijnë nga regjimi iranian”, tha Centcom.

U.S. forces have destroyed Islamic Revolutionary Guard Corps command and control facilities, Iranian air defense capabilities, missile and drone launch sites, and military airfields during sustained operations. We will continue to take decisive action against imminent threats… pic.twitter.com/0aHEyVHf5e

— U.S. Central Command (@CENTCOM) March 3, 2026

Kur u pyet për reagimin ndaj sulmit në Ambasadën amerikane në Riad dhe vdekjen e ushtarëve amerikanë në konfliktin me Iranin, Presidenti amerikan, Donald Trump, i tha një gazetari se “do ta mësoni shumë shpejt”

Ndërsa Ministria e Mbrojtjes e Arabisë Saudite njoftoi përmes rrjetit social X se dy dronë goditën Ambasadën amerikane në Riad, duke shkaktuar një zjarr të vogël dhe dëme të kufizuara materiale, sipas një vlerësimi paraprak. Ndërkohë, Ambasada amerikane në Kuvajt bëri të ditur se do të qëndrojë e mbyllur deri në njoftimin e radhës, “për shkak të tensioneve të vazhdueshme rajonale”.

Security Alert: U.S. Embassy Kuwait Closure

Due to ongoing regional tensions, the U.S. Embassy in Kuwait will be closed until further notice. We have canceled all regular and emergency consular appointments. We will communicate when the embassy returns to normal operations.… pic.twitter.com/x3hJQXp51Q

— U.S. Embassy Kuwait (@USEmbassyQ8) March 3, 2026

Duke folur për Fox News, Zv/Presidenti amerikan, JD Vance, ka sqaruar se negociatat me Iranin për programin e tij bërthamor dështuan, pasi zyrtarët konstatuan se garancitë e ofruara nga Teherani, “nuk e kalojnë testin e besueshmërisë”.

Për këtë arsye, sipas tij, presidenti Donald Trump autorizoi Operacionin Tërbimi Epik në Iran, i cili nisi më 28 shkurt.

JD Vance tha se përfaqësuesit amerikanë, në mesin e tyre Steve Witkoff, Marco Rubio dhe Jared Kushner – zhvilluan bisedime “të kujdesshme” në Gjenevë, me synimin për të kufizuar aktivitetet bërthamore të Iranit, në këmbim të lehtësimit të sanksioneve.

Bisedimet u ndërprenë për shkak të pasurimit të uraniumit nga ana e Iranit.

“Asnjë nuk kundërshton që iranianët të prodhojnë izotope mjekësore; problem janë objektivat e pasurimit që shërbejnë vetëm për krijimin e armëve bërthamore”, tha Vance.

Ai shtoi se Uashingtoni do të preferonte “një regjim miqësor në Iran, një vend të qëndrueshëm dhe një vend që është i gatshëm të punojë me Shtetet e Bashkuara”.

Ndërkohë RFE raporton se derisa Irani përballet me pasojat e sulmeve të SHBA-së dhe Izraelit, që kanë vrarë disa – e ndoshta edhe dhjetëra – udhëheqës të lartë, Ali Larijani shfaqet si figurë kryesore në pushtetin e mbetur të vendit.

Politikan veteran, me një karrierë që përfshin pothuajse gjithë historinë e Republikës Islamike, Larijani u rikthye vitin e kaluar, pas një pushimi relativ, dhe që atëherë, ka një rol gjithnjë e më të rëndësishëm.

Dhe, në fund, ndërsa publikohen pamje të shkatërrimit masiv që shkaktuan raketat në Teheran, gjatë ditës së tretë të fushatës ushtarake të SHBA-së dhe Izraelit kundër Iranit, dhe Shoqata e Gjysmëhënës së Kuqe iraniane vlerësoi se të paktën janë 787 të vdekur, ndërsa Grupi i të drejtave të njeriut Hengaw me seli në Norvegji raporton për mbi 1.500 të vdekur, rreth 1.300 nga forcat e armatosura dhe rreth 200 civilë, ndërkohë çmimet e gazit natyror vazhdojnë të rriten ndjeshëm, ndërsa konflikti në Lindjen e Mesme përshkallëzohet.

Sipas raportimeve të publikuara sot, çmimi referencë i gazit në Evropë është rritur për 33%. Kjo lëvizje vjen pas një rritjeje të djeshme prej rreth 50%. Po dje, kompania qeveritare e Katarit, QatarEnergy – një nga eksportuesit më të mëdhenj të gazit në botë – ndaloi prodhimin pas “sulmeve ushtarake” ndaj objekteve të saj.