Irani kryen ekzekutimin e parë për protestat antiqeveritare

Irani tha sot se ka ekzekutuar një të burgosur, që supozohet se është dënuar gjatë protestave mbarëkombëtare të javëve të fundit.

Media shtetërore ka raportuar se Mohsen Shekari është shpallur fajtor për “armiqësi ndaj Zotit”.

Ai është akuzuar se ka kryer trazira, duke bllokuar një rrugë kryesore në Teheran më 25 shtator dhe duke plagosur me thikë një pjesëtar të forcës paramilitare Basij.

Ky ekzekutim besohet se shënon ndëshkimin e parë të tillë të kryer nga Teherani.

Ekzekutimi vjen teksa edhe të burgosur të tjerë përballen me dënime me vdekje për përfshirjen e tyre në protestave.

Protestat kanë shpërthyer kundër Policisë për Moral në Iran, pas vdekjes së Mahsa Aminit, 22-vjeçares e cila është ndaluar nga zyrtarë të këtij departamenti, nën dyshimet se nuk e ka vendosur si duhet mbulesën në kokë.

Ndërkohë protestat janë zgjeruar edhe me kërkesa tjera, duke sfiduar teokracinë e Iranit në mënyrë më serioze prej Revolucionit Islamik të vitit 1979.

Aktivistët paralajmërojnë që edhe persona tjerë mund të ekzekutohen.

“Ekzekutimi i Mohsen Shekarit duhet të rezultojë me reagime të fuqishme, pasi në të kundërtën do të përballemi me ekzekutime të përditshme të protestuesve,” tha Mahmood Amiry-Moghaddam, drejtor i Grupit për të Drejtat e Njeriut në Iran, që ka selinë në Oslo.

“Ky ekzekutim duhet të përcillet me pasoja praktike në nivel ndërkombëtar”.

Këshilli i Kombeve të Bashkuara për të Drejta të Njeriut ka votuar më 24 nëntor për të nisur hetime rreth shtypjes së protestave.

Irani e kundërshtuar një nismë të tillë duke thënë se këto veprime shkelin sovranitetin kombëtar.

Autoritetet iraniane kanë pasur vështirësi në ndaljen e protestave dhe i kanë përshkruar ato si “trazira” të nxitura nga vendet që i konsideron armike si: Shtetet e Bashkuara, Britaninë dhe Izraelin.

Organizata ndërkombëtare për të drejta të njeriut, Amnesty International, ka thënë se autoritetet iraniane synojnë të ekzekutojnë edhe të paktën 21 persona tjerë përmes “gjykimeve të rreme”.

Deri më tani, të paktën 475 persona kanë vdekur nëpër protestat e nisura javë më parë në Iran, derisa mbi 18.000 të tjerë besohet se janë arrestuar.

Irani është një prej vendeve që kryen më së shumti ekzekutime në botë. Autoritetet e këtij vendi i ekzekutojnë të burgosurit kryesisht duke i varur./RFE/