Irani refuzon negociatat me SHBA-në, Trump paralajmëron hakmarrje

Kryetari i Këshillit Suprem të Sigurisë Kombëtare të Iranit, Ali Larijani, tha se Teherani nuk do të negociojë me Washingtonin.

Ali Larijani i bëri komentet disa orë pasi Presidenti i Shteteve të Bashkuara, Donald Trump, u zotua se do të vazhdojë t’i ndëshkojë terroristët me forcën e plotë të ushtrisë amerikane ndërsa i bëri sërish thirrje Gardës Revolucionare që të dorëzojë armët, patriotëve iranianë u bëri thirrje që ta shfrytëzojnë këtë moment dhe ta rimarrin vendin në duart e tyre.

Përmes një postim në rrjetin X, Kryetari i Këshillit Suprem të Sigurisë Kombëtare të Iranit, Ali Larijani, u shpreh:

“Ne nuk do të negociojmë me Shtetet e Bashkuara. Sot, kombi iranian po mbron veten”.

Ndryshe, përmes një video-mesazhi në rrjetin social Truth, Presidenti amerikan Donald Trump nderoi tre ushtarët e vrarë amerikanë gjatë kundërsulmeve iraniane duke premtuar se do të merret hak.

“U vranë si patriotë të vërtetë amerikanë, të cilët bënë sakrificën më të lartë për vendin tonë, ndërsa ne vazhdojmë misionin e drejtë për të cilin ata dhanë jetën.

Fatkeqësisht, ka shumë të ngjarë që të ketë edhe më tepër të vrarë, para se gjithçka të përfundojë. Kështu janë gjërat. Me gjasë do të ketë edhe më shumë,” tha Presidenti Trump duke theksuar se operacionet luftarake kundër Iranit do të vazhdojnë deri sa SHBA të arrijë qëllimet e saj strategjike në këtë konflikt.

“Luftimet po vazhdojnë aktualisht me forcë të plotë dhe do të vazhdojnë derisa të përmbushen të gjitha objektivat tona.

Një Iran me raketa me rreze të gjatë veprimi dhe me armë bërthamore përbën një kërcënim serioz për çdo amerikan. Ne nuk mund të lejojmë që një komb që krijon ushtri terroriste të zotërojë armë të tilla,” tha Presidenti i SHBA, Donald Trump.

Ndërkohë raportohet se dy ditë pas nisjes së konfliktit të Izraelit dhe SHBA-së me Iranin, sulmet hakmarrëse të Republikës Islamike ndaj vendeve fqinje që strehojnë baza ushtarake amerikane, vazhdojnë.

Mëngjesin e sotëm, Kuvajti njoftoi se ka rrëzuar disa dronë sulmues iranianë. Agjencia zyrtare e lajmeve e Kuvajtit, duke cituar Drejtorinë e Përgjithshme të Mbrojtjes Civile, raportoi se shumica e dronëve u kapën pranë lagjeve Ramatjah dhe Salva. Raporte për të lënduar nga këto sulme nuk ka.

Një zëdhënës i Ministrisë së Mbrojtjes së Kuvajtit njoftoi se disa avionë ushtarakë amerikanë u rrëzuan mëngjesin e sotëm në territorin e këtij vendi, por se pilotët dhe ekuipazhet shpëtuan. Autoritetet nisën menjëherë operacionet e kërkim-shpëtimit, ndërsa ekuipazhet u evakuuan dhe u dërguan në spital për kontrolle shëndetësore dhe trajtim të nevojshëm.

Zëdhënësi shtoi se ka pasur koordinim të drejtpërdrejtë me forcat amerikane për detajet e incidentit dhe se janë marrë disa masa të përbashkëta teknike. Sipas tij, autoritetet po vazhdojnë të hetojnë, për të përcaktuar shkakun e rrëzimit.

Baza ajrore RAF Akrotiri u godit nga një sulm i dyshuar me dron, thekson Ministrisë britanike të Mbrojtjes duke shtuar se Administrata e Zonave të Bazave Sovrane në Qipro tha se ka plane për shpërndarjen e përkohshme të personelit jothelbësor, të vendosur në bazën britanike RAF Akrotiri.

“Ndërsa e kuptojmë që njerëzit mund të jenë të shqetësuar, ne nuk besojmë se kjo është e nevojshme. Shpërndarja e përkohshme vlen vetëm për Stacionin RAF Akrotiri,” thuhet përmes deklaratës duk e ekonsideruar shpërndarjen e personelit si një masë paraprake.

Objektet e tjera në Episkopi, Dhekelia dhe Ayios Nikolaos, sqaron Ministria britanike e Mbrojtjes do të funksionojnë si zakonisht.

Përmes një deklarate të përbashkët, Shtetet e Bashkuara, Bahrejni, Jordania, Kuvajti, Katari, Arabia Saudite dhe Emiratet e Bashkuara Arabe kanë dënuar fuqishëm sulmet e papërgjegjshme me raketa dhe dronë të Iranit ndaj territoreve sovrane në rajon.

“Këto sulme pa bazë shënjestruan territore sovrane, rrezikuan popullsinë civile dhe dëmtuan infrastrukturën civile,” thuhet në deklaratën e përbashkët.

Por në këtë mengjes, Izraeli njoftoi mëngjesin se ushtria e tij ka goditur objektiva të lëvizjes Hezbollah në Liban, pasi ky grup militant – i mbështetur nga Irani – mori përgjegjësinë për një sulm me raketa dhe dronë në veri të Izraelit.

Sipas ministris së Shëndetësisë të Libanit, sulmet izraelite në Bejrut dhe në Libanin jugor lanë të vrarë 31 persona dhe të plagosur 149 të tjerë.

Të dhënat e fundit të Organizatës iraniane Gjysmëhëna e Kuqe bëjnë të ditur sot për 555 persona të vrarë në sulmet e përbashkëta të SHBA dhe Izraelit kundër Iranit.

Sipas raportit të kësaj organizate, 131 qytete janë përfshirë nga sulmet që nga dita e parë e tyre më 28 shkurt.

Gjysmëhëna e Kuqe shtoi se operacionet e shpëtimit, ndihmës, transportit dhe shërbimeve mjekësore janë duke vazhduar.