Irani zotohet për hakmarrje, Izraeli paralajmëron qytetarët jashtë shtetit
Izraeli paralajmëroi për një kërcënim në rritje ndaj shtetasve të tij jashtë vendit, pas thirrjes së Iranit për hakmarrje ndaj vrasjes së shkencëtarit të lartë bërthamor iranian, javën e kaluar në Teheran.
Për vrasjen e shkencëtarit, Mohsen Fakhrizadeh, Irani ka fajësuar pjesërisht Izraelin.
“Në vazhdën e kërcënimeve të fundit nga elementët iranianë, kemi frikë se Irani mund të sulmojë objektivat izraelite”, tha ministria e jashtme izraelite duke paralajmëruar për sulme të mundshme kundër shtetasve të saj në Afrikë dhe në vendet afër Iranit, duke përmendur Gjeorgjinë, Azerbajxhanin, Turqinë, rajonin kurd të Irakut, Emiratet e Bashkuara Arabe dhe Bahreinin.
“Është e mundur që një pjesë e valës aktuale të terrorizmit islamik të arrijë objektivat e identifikuar me Izraelin ose komunitetet hebraike, sinagogat, restorantet dhe muzeumet hebraike,” paralajmëroi ministria izraelite duke u bërë thirrje udhëtarëve të lexonin çdo paralajmërim në lidhje me destinacionin e tyre, raporton RFE.
Këshilli i Sigurimit Kombëtar, duke përmendur sulmet e kryera tashmë në Francë, Gjermani dhe Austri, tha se organizatat globale të xhihadistëve, veçanërisht grupi i Shtetit Islamik, po demonstrojnë një motivim të lartë për të kryer sulme terroriste.
Ndryshe, Bahreini dhe Emiratet e Bashkuara Arabe normalizuan lidhjet me Izraelin në shtator. Ministri i Jashtëm i Izraelit, Gabi Ashkenazi, kishte në plan të vizitojë Bahreinin në fundjavë për një konferencë rajonale, por burime diplomatike thanë për AFP se udhëtimi i tij u anulua, pasi Irani fajësoi Izraelin për vrasjen e Fakhrizadeh dhe u kërcënua me hakmarrje.
Ndërkohë Kryeministri izraelit, Benjamin Netanyahu akuzoi Iranin se ka përfituar nga marrëveshja e tij ndërkombëtare bërthamore, e cila lejoi heqjen e sanksioneve ekonomike, para se ato të rivendoseshin dhe të ashpërsoheshin nga presidenti i SHBA-së, Donald Trump – në mënyrë që të shtrijë ndikimin e tij në Irak , Jemen dhe Siri.
