Isa Mustafa jep dorëheqje
Pas shpalljes së rezultatit të zgjedhjeve të 14 Shkurtit ku Lidhja Demokratike pësoi humbje të thellë dhe mbledhjes së Kryesisë së LDK, Isa Mustafa konfirmoi dorëheqjen nga posti i Kryetarit të Lidhjes Demokratike të Kosovës.
Duke folur para gazetarëve, Mustafa tha se ka thirrë mbledhjen e Kuvendit të LDK-së për të zgjedhur Kryetarin e ri të partisë, që nënkupton tha ai, largimin e tij.
“E kishim mbledhjen e kryesisë së LDK-së, të cilën e kam thirrur unë pas rezultateve të zgjedhjeve. Rezultati është shumë i keq për LDK-në, që nuk e kemi pritë fare edhe nga takimet në terren dhe puna që e ka bërë Hoti. E kam njoftuar kryesinë se do ta pres kuvendin e LDK-së për zgjedhjen e kryetarit të ri të partisë në një periudhë shumë të shpejt kohore, i kemi 60 ditë për ta bërë këtë, por do ta bëjë më shpejt që ta zgjedhim më shpejt kryetarin e ri,” tha Isa Mustafa duke sqaruar se ende nuk është zgjedhur ushtruesi i detyrës të Kryetarit të LDK-së.
“Kur e thërras Kuvendin nënkupton që unë jam larguar. Nuk kemi zgjedhë ende ushtrues detyre të partisë.”
Ndryshe, bazuar në 99.20% të votave të numëruara, LDK renditet e treta me 13.08 për qind ose 103.002 vota, duke shënuar një ulje drastike në krahasim me rezultatin e e zgjedhjeve të fundit më 2019 ku kishte 24.548 për qind ose 206.516 vota. Njëkohësisht rezultati i zgjedhjeve të 14 shkurtit ështe dhe rezultati më i keq që nga themelimi i Lidhjes Demokratike të Kosovës.
