Ish-Ambasadori SHBA: Me mosnjohje të pavarësisë së Kosovës, Serbia njeh rrëmbimin rus të Krimesë!
Ish-Ambasadori i SHBA në Beograd, Michael Kirby, beson se ka lidhje në mes të pritshmërisë së Rusisë që delegacioni parlamentar i Serbisë të mos marrë pjesë në Forumin e Krimesë në Zagreb, dhe mungesës reale të përfaqësuesve serb në këtë tubim në Kroaci, i cili u organizua nga Ukraina.
“Prej së largu Serbia ka zgjedhur që të pozicionohet në anën e Rusisë, në luftën ruso-ukrainase,” tha diplomati i njohur amerikan për VOA i bindur për ndikimin e madh rus në institucionet serbe.
“Besoj se rusët kanë ndikim domethënës në institucionet e rëndësishme të Serbisë, si dhe Partisë Përparimtare Serbe (partia Vuçiçit v.j.). Nga viti 2012 ka filluar periudha e rëndësishme e largimit të qeverisë serbe nga rruga evropiane dhe kthimit të qartë drejt Rusisë, e në veçanti Putinit,” është i bindur Kirby i cili ka shërbyer në Serbi nga viti 2012 deri në vitin 2016 ndërsa e cilëson këtë ndryshim si mjaft shqetësues.
“Shumë vetë do të pyeten nëse sot Qeveria e Serbisë është e përkushtuar në rrugën evropiane. Ajo deklaron se është kthyer nga e ardhmja demokratike. Nëse po, veprat e saj janë në kundërshtim me fjalët,” tha diplomati amerikan Michael Kirby duke rikujtuar se ai ka shërbyer në Beograd kur Rusia ka kryer agresionin ilegal në gadishullin ukrainas, Krime.
“Rusia sulmoi fqinjin e saj dhe i rrëmbeu Krimenë. Duke pasur parasysh kundërshtimin e Serbisë për pavarësinë e Kosovës, duket se Serbia po vepron me dy standarde duke pranuar rrëmbimin rus të këtij territori,” tha Ish-Ambasadori amerikan në Beograd, Michael Kirby, duke përfunduar:
“Sikur të isha fqinji i Serbisë dhe do të shikoja admirimin e hapur për Putinin, njeriun i cili dy herë ka sulmuar fqinjin, Ukrainën, një herë fqinjin tjetër, Gjeorgjinë, dhe kurrë nuk u largua nga territori i okupuar i ish-fqinjit tjetër, Moldavisë, do pyesja veten, a e ka çuar kjo që të mendoj të imitoj lëvizjet e Putinit, dhe jo vetëm ti shprehë admirim.”
Ndryshe, Serbia, kandidate për anëtarësim në Bashkimin Evropian, me Bjellorusinë janë shtetet e vetme evropiane që nuk zbatojnë politikë ndëshkuee ndaj Rusisë për shkak të agresionit në Ukrainë.
Në kryeqytetin e Kroacisë, Zagreb, për gjatë dy ditëve, përfaqësues të 50 shteteve dhe organizatave kanë shqyrtuar mënyrat se si të ndihmohet Ukraina, shtet i cili për muaj të tërë është në shënjestër të agresionit ushtarak të Rusisë.
