Ish-Ambasadori William Walker nderohet me titullin “Doctor Honoris Causa”
Ish-kreu i misionit të OSBE-së gjatë luftës në Kosovë, William Walker, është nderuar sot me titullin “Doctor Honoris Causa” nga Universiteti “Haxhi Zeka”në Pejë.
Gjatë fjalës së tij, Walker tha se do donte të fliste për masakrën e Reçakut, por këto fjalë do t’i ruajë për nesër më 15 janar, ditën kur ka ndodhur masakra më e tmerrshme në fundshekullin e kaluar në Kosovë.
“Dua të falënderoj Universitetin “Haxhi Zeka”, për nderin që më keni bërë mua. Kam dëgjuar shumë për këtë universitet dhe jam krenar që ta marr çmimin sot. Kjo po ndodh sot në Pejë, njëri nga vendet e parapëlqyera në Kosovë. Mendoj që Kurti dhe Pacolli do të donin të kishin lindur këtu. E që nga vizita ime e parë në Kosovë asnjëherë nuk e kam lënë pa e vizituar Pejën,” tha Ish-ambasadori i OSBE-së i cili alarmoi botën për atë që kishte ndodhur në Reçak.
E rektori i Universitetit “Haxhi Zeka” Armand Krasniqi tha se titulli “Honoris Causa” po i jepet ambasadorit Walker në shenjë nderimi për krejt çka bëri për kauzën e shqiptarëve.
“Sidomos për kontributin e tij në sferën humanitare në mbrojtjen e të drejtave dhe lirive elementare të njeriut e në veçanti për denoncimin e gjenocidit serbe ndaj shqiptarëve në Kosove dhe jo vetëm,” tha Armand Krasniqi.
Në ceremoninë e ndarjes së këtij titulli ishte i pranishëm edhe kryeministri Albin Kurti, ministrja e Arsimit, Arbërie Nagavci dhe përfaqësues të tjerë nga jeta politike, akademike e shoqëria civile.
Ndryshe, 15 janarin është Ditë e Përkujtimit të gjenocidit ndaj shqiptarëve ku përveç Reçakut përkujtohen dhe viktimat e masakrave në Prekaz, Likoshan, Qirez, Abri, Poklek, Podujevë, Suharekë, Krushë të Madhe e Krushë të Vogël, Celinë, Mejë dhe qindra masakra që ndodhën gjatë luftës së Kosovës.
Në luftën e Kosovës, e cila filloi më 28 shkurt të vitit 1998, pas sulmit serb mbi fshatrat Likoshan dhe Qirez dhe përfundoi me nënshkrimin e Marrëveshjes së Kumanovës më 11 qershor 1999, 848.000 shqiptarë u dëbuan nga Kosova, mbi 12 mijë u vranë dhe u masakruan dhe sot pas 24 viteve që thuhet se lufta ka përfunduar, nuk dihet fati i 1.600 të zhdukurve!
