Ish-drejtoresha e kompanisë META: Bashkëpunuam me Pekinin, kritikëve u mbyllëm gojën!
META cenoi sigurinë kombëtare të SHBA-së për të zhvilluar një biznes prej 18 miliardë dollarësh në Kinë, dëshmoi ish-punonjësja e META-s, Sarah Wynn Williams, para senatorëve amerikanë.
Në një seancë dëgjimore para Nënkomitetit Gjyqësor të Senatit, Wynn Williams, ish-drejtoresha e politikave publike globale në Facebook, akuzoi menaxhmentin e META-s se i ka lejuar Partisë Komuniste Kineze qasje në të dhënat e përdoruesve, përfshirë këtu edhe ato të qytetarëve amerikanë, raporton BBC.
META i mohoi pretendimet e saj. “Dëshmia e Sara Wynn Williams është plotësisht e shkëputur nga realiteti dhe e mbushur me pasaktësi,” tha zëdhënësi i META-s, Ryan Daniels, duke shtuar se Mark Zuckerberg ka shprehur publikisht interes për të bërë biznes në Kinë, por theksoi:
“Fakti është se sot shërbimet tona nuk janë të disponueshme në Kinë.”
Megjithatë, META gjeneron të ardhura nga reklamuesit me seli në Kinë.
Censurë dhe mbyllje goje kritikëve
Wynn Williams deklaroi gjithashtu se META bashkëpunoi me autoritetet kineze për të krijuar mjete censure që synonin mbylljen e gojës së kritikëve të regjimit.
Si shembull, ajo deklaroi se META iu bind kërkesës së Pekinit dhe fshiu llogarinë në Facebook të disidentit kinez Guo Wengui, i cili jeton në SHBA.
META pretendon se profili i Guos u hoq sepse shkelte standardet e komunitetit.
“Një gjë që Partia Komuniste Kineze dhe Mark Zuckerberg ndajnë është dëshira për të mbyllur gojën kritikëve. Unë flas nga përvoja personale,” u tha Wynn Williams senatorëve.
Pasojat dhe presionet ligjore
Në muajin mars, ajo botoi kujtimet me titull “Careless People” /Lexo shqip: Njerëz të Pakujdesshëm/ ku kritikon kompaninë META. Kompania mori një urdhër të përkohshëm ndalimi në SHBA kundër promovimit të librit, duke e përshkruar atë si “të rremë dhe shpifës” dhe duke pretenduar se “nuk duhej të ishte botuar kurrë”.
Seanca dëgjimore u drejtua nga senatori Josh Hawley i Misurit, i cili tha se META “bëri gjithçka për të penguar Wynn Williams të dëshmonte”.
“Pse Facebook po përpiqet kaq dëshpërimisht ta ndalojë këtë dëshmitare të tregojë atë që di?” pyeti Hawley.
Gjatë të njëjtës seancë dëgjimore, Hawley pretendoi se META e kërcënoi Wynn Williams me gjoba.
“Ata e kërcënuan me një gjobë prej 50.000 dollarësh sa herë që përmendte Facebookun në publik – edhe nëse po thoshte të vërtetën,” tha senatori Hawley.
META konfirmoi për BBC se dënimi mund të zbatohet për çdo shkelje të marrëveshjes së ndarjes, të cilën Wynn Williams e nënshkroi kur u largua nga kompania në vitin 2017.
Wynn Williams deklaroi se asaj i ishte thënë se çdo përjashtim nga klauzola e mosdiskreditimit do të “minonte të gjithë rregullin”. META më pas sqaroi se deklarata ishte koment i një arbitri, jo qëndrimi zyrtar i kompanisë.
Kompania tha gjithashtu se nuk ishte kundër dëshmisë së saj para Kongresit, por nuk iu përgjigj pyetjes së BBC-së nëse do të fillonte ende procedurat kundër saj për deklaratat e sotme.
“Katër javët e fundit kanë qenë shumë të vështira,” tha Wynn Williams duke shtuar: “Vendimi për të ardhur dhe për të dëshmuar para Kongresit ishte jashtëzakonisht i vështirë!”
