Ish-Këshilltari i Thaçit emërohet ministër i Shëndetësisë së Kosovës
Kryeministri i Kosovës, Albin Kurti, sot ka emëruar, Dr.Rifat Latifin, ministër të ri të Shëndetësisë.
Kurti tha se Dr.Latifi ka ardhur nga SHBA për të marrë detyrën ndërsa, ministri i sapo emëruar, Dr.Rifat Latifi, tha se do të angazhohet në ngritjes së standardeve të shëndetësisë në Kosovë.
“Ai erdhi pardje nga New Yorku në Prishtinë. Ai ka studiuar për mjekësi në Universitetin e Prishtinës dhe pastaj ka përfunduar dy specializime, atë për kirurgji të përgjithshme dhe traumatologji e reanimacion në New York të Shteteve të Bashkuara të Amerikës. Përvoja e tij akademike dhe profesionale përfshinë qendra spitalore dhe universitete me emër në disa shtete federale të SHBA-ve,” tha Albin Kurti ndërsa kirurgu i njohur shqiptar u zotua:
“Unë premtoj se ekipi im dhe unë do të angazhohemi me gjithë qenien që në mënyrë afatgjate të ngrisim standardet mjekësore, duke ngritur edukimin dhe trajnimin e të gjithë specializimeve si dhe ngritjen e aftësive të kapaciteteve njerëzore për hulumtime shkencore në shkencat mjekësore, sikur për mjekët ashtu edhe për infermierët dhe të gjithë punëtorët tjerë shëndetësorë,” tha Dr.Latifi duke përfunduar:
“Me ngritjen e kapaciteteve njerëzore ne investojmë në ngritjen e kualitetit të shërbimeve dhe në këtë mënyrë shtojmë volumin e shërbimeve mjekësore në Kosovë. Me të ardhurat prej këtyre shërbimeve, ne riinvestojmë sërish në kualitet.”
Mjeku shqiptaro-amerikan, Rifat Latifi nuk është emër i panjohur në Kosovë. Në vitin 2009 ai ishte këshilltar i Kryeministrit Hashim Thaçi.
Më 16 mars të vitit 2009, Zyra e Kryeministrit kishte njoftuar se Rifat Latifi është emëruar këshilltar i jashtëm i Thaçit për shëndetësinë, si konkretizim i angazhimeve në sektorin e shëndetësisë, që është një ndër prioritetet strategjike të Qeverisë së Republikës së Kosovës.
“Dr. Latifi ka dhënë një kontribut të shquar akademik edhe përmes botimit të tetë librave dhe mbi 100 artikujve shkencor si autor ose bashkë-autor. Dr. Rifat Latifi është një kosovar që ka kaluar jetën duke qenë i përkushtuar për mirëqenien e pacientëve në Kosovë dhe jashtë saj, si dhe me angazhime konkrete në funksion të reformimit të kujdesit shëndetësor në Kosovë,” thuhej në njoftimin e Zyrës së Kryeministrit.
Dr.Rifar Latifi ka mbaruar studimet për mjekësi në Fakultetin e Mjekësisë, në Universitetin e Prishtinës. Ai ka punuar në universitete dhe qendra spitalore me emër në SHBA, si Texas, Filadelfia, New York, Doha. Aktualisht, është profesor i kirurgjisë dhe president i Kolegjit të Kirurgëve Amerikanë për shtetin e Arizonës.
Dr.Latifi është krijues dhe implementues i Programit të Telemjekësisë në Kosovë dhe Shqipëri, program ky i financuar nga USAID.
Është Laureat i Çmimit për Arritjen e Shekullit 21 për Shëndetësi nga Programi Computerworld Honors dhe Çmimin Ndërkombëtar për Promovimin e Shëndetit nga Komisioni i Akreditimit të Rishikimit të Përdorimit (URAC), më 2011.
Dr.Rifat Latifi ka iniciuar e siguruar fonde dhe ka mbikëqyrur tri ekipe kombëtare të programit të telemjekësisë në Evropë dhe Afrikë, për të cilat ai mori çmimin e Kolegjit Amerikan të Kirurgëve, ACS, dhe “Pfizer International Surgical Volunteerism 2015”
Dr.Latifi ka botuar 9 libra për mjekësinë dhe është autor i mbi 100 artikujve shkencorë. Ai ka kryer specializimin në Kirurgji të Përgjithshme, një vit në Kliniken e Klivelandit, e pastaj ne Universitetin Yale.
Specializimin e dytë në Traumatologji të përgjithshme dhe reanimacion, e ka mbaruar në New York College of Medicine.
Pas specializimeve, Dr.Rifat Latifi ka shkuar në Richmond, Virginia, për një kohë të shkurtër, e më pas në Tucson, Arizona.
