Ish-krerët e UÇK-së në Hagë, Prokuroria kërkon 180 vjet burg për Thaçin, Veselin, Krasniqin e Selimin!
Fjala përfundimtare e Prokurorisë në Gjykatën Speciale në Hagë në rastin kundër Ish-Presidentit të Kosovës, Hashim Thaçi, Ish-Kryetarëve të Parlamerntit Kadri Veseli dhe Jakup Krasniqi, dhe ish-deputetit, Rexhep Selimi, filloi shumë frikshëm se sa e kishin menduar edhe kokat më të mbrapshta kundër Kosovës!
Kryeprokurorja Kimberly West duke e konsideruar krim të rëndë vrasjen e shqiptarëve bashkëpunëtorë të Serbisë, pretendon se 100 persona janë vrarë dhe qindra tjerë janë abuzuar, në dhe rreth 50 plus kampeve të ndalimit të Ushtrisë Çlirimtare të Kosovës, UÇK.
“Kjo çështje ka të bëjë me qëllimin e katër të akuzuarve për të fituar dhe ushtruar kontroll në gjithë Kosovën. Kjo vendosmëri për kompetencë dhe fuqi u has me diçka, dhe kjo kishte të bënte me persona që kishin dalë si kundërshtarë ose përcaktoheshin se ishin bashkëpunëtorë me forcat serbe, ose zyrtarë serbë, ose që nuk mbështesinin synimet e UÇK-së,” tha West duke saktësuar se shpesh aty përfshiheshin persona të lidhur me Lidhjen Demokratike të Kosovës, persona romë dhe serbë.
“Në mënyrë që ta arrinin qëllimin e tyre, këta persona të akuzuar kanë kryer krime kundër kundërshtarëve të tyre të perceptuar për të pasur kontroll në gjithë Kosovën,” tha Kryeprokurorja e Gjykatës Speciale në Hagë duke kërkuar 45 vjet burgim për secilin nga ish-krerët e Ushtrisë Çlirimtare të Kosovës, gjatë paraqitjes së fjalëve përfundimtare në seancën e sotme.
“ZPS-ja kërkon vendim dënimin për të gjitha pikat e aktakuzës dhe vendosjen e një vendimi unik prej 45 viteve mbështetur në kontributet individuale të krimeve, të kryera apo të bëra prej secilit prej personave, Hashim Thaçi, Kadri Veseli, Rexhep Selimi dhe Jakup Krasniqi,” tha West se këto krime janë kundër njerëzimit dhe të rënda si natyrë dhe se akuzat ndaj katërshes nuk e kanë humbur peshën, por vazhdojnë ende të jenë të rënda.
Më pas, fjalën e ka vazhduar Prokurori Alan Tieger me një përmbledhje të deklaratave të dëshmitarëve për ish-krerët e UÇK-së.
Ndryshe, Prokuroria ka kërkuar sot tetë orë për shpalosjen e deklaratave!
Prokuroria, mbrojtësit e viktimave dhe mbrojtja e të akuzuarve, duke filluar prej sot e deri në 18 shkurt do të paraqesin në Dhomat e Specializuara, fjalën përfundimtare për gjykimin.
Në seancën e fundit Hashim Thaçi, Kadri Veseli, Jakup Krasniqi e Rexhep Selimi, që akuzohen për krime lufte dhe krime kundër njerëzimit, krime që pretendohet se janë kryer midis muajit mars të vitit 1998 dhe shtatorit të vitit pasues në disa lokacione në Kosovë dhe në veri të Shqipërisë, do t’i kenë në dispozicion nga 20 minuta për të dhënë qëndrimet e tyre.
Ndryshe, ajo që prokurorët e kësaj çështje arritën të shpalosin para kësaj gjykate deri më sot, sipas ekspertëve e bëri këtë gjykatë joserioze dhe të pabesueshme ende pa e thënë fjalën e fundit.
Pas fjalës përfundimtare, trupi gjykues ka 90 ditë kohë për të marrë një Vendim.
