Ish-kreu i Krimeve të Rënda Besim Hajdarmataj në vetting, rezulton pa probleme

Ish-kryeprokurori i Krimeve të Rënda, Besim Hajdarmataj, aktualisht prokuror në këtë prokurori i është nënshtruar procesit të vettingut.

Besim Hajdarmataj është paraqitur personalisht në seancë pa përfaqësimin nga një avokat.

Trupa gjykuese hetoi prokurorin Besim Hajdarmataj bazuar në 3 kriteret, vlerësimin e pasurisë, kontrollin e figurës dhe  vlerësimin e aftësive profesionale ku rezultoi pa pobleme.

Relatorja Suela Zhegu ka deklaruar se në lidhje me pasurinë ILDKPKI ka dorëzuar raportin në KPK se deklarimi i prokurorit  është i saktë.

“Besim Hajdarmataj ka burime të ligjshme dhe nuk ka kryer fshehje të pasurisë”

Nga hetimi i KPK, rezulton se Hajdarmataj ka depozitë bankare në një bankë 5 milion lekë dhe depozitë 1 milion lekë si rezultat i kursimeve. Ka gjendje kesh 500 mijë lekë. Ndërsas dhuratë nga vëllai shumën 6 mijë euro dhe 4 mijë paund

Referuar raportit të DSIK thuhet se Hajdarmataj ka përshtatshmërinë për vijimin e detyrës

“Besim Hajdarmataj nuk rezulton që të ketë të dhëna me persona të papërshtatshëm. Ai ka aftësi për interpretim dhe zbatim ligji, i kushton rëndësi çdo fakti penal. Në pesë dosjet e analizuara, Hajdarmataj ka rezultuar mjaft i suksesshëm, me provat e administruara.”

Tabela financiare është pozitive përgjatë viteve deri në 2016. Ndërkohë për kontrollin e figurës, DSIK ka deklaruar se subjekti është i përshtatshëm për të vijuar detyrën. Prokuroria ka dërguar raport për aftësitë profesionale të Hajdarmataj, ku thuhet se ka hetuar 40 procedime, nuk ka pasur masa disiplinore dhe as nuk ka të dhëna që cenojnë figurën.

Nuk rezulton të ketë foto, vëzhgime apo kontakte telefonike me persona të papërshtatshëm. Ka aftësi për të drejtuar hetimin dhe është vlerësuar shumë mirë. Ka aftësi të mira drejtuese dhe respekton parashikimet ligjore dhe nënligjore si dhe është eficent dhe efektiv.

Ndaj Besim Hajdarmatajt ka pasur 11 ankesa dhe janë shqyrtuar 3 denoncime online. Komisioni ka vërejtur se këto fakte apo rrethana nuk përbëjnë provë. Në muajin prill u paraqitën tre denoncime dhe për këtë shkak u rihap hetimi. Denoncimet se Hajdarmataj ka kontakte të papërshtatshme nuk rezultuan të bazuara

Vendimi për Prokurorin e Krimeve të Rënda, Besim Hajdarmataj do të jepet në 16 tetor.

Ndryshe, Besim Hajdarmataj e ka filluar karrierën në sistemin e drejtësisë në vitin 1999 dhe përgjatë 20 viteve, ai ka mbajtur poste drejtuese në Prokurorinë e Tropojës dhe të Kurbinit. Në maj 2015, ai u emërua prokuror në Prokurorinë e Krimeve të Rënda dhe një vit më vonë mori drejtimin e kësaj prokurorie.

Me ardhjen e Arta Markut në krye të Prokurorisë së Përgjithshme, Hajdarmataj u largua fillimisht nga posti i drejtuesit të Krimeve të Rënda dhe në shtator 2018 u komandua në Prokurorinë e Pogradecit. Ai e konsideroi transferimin të paligjshëm dhe me vendim të Gjykatës Administrative dhe më pas të Këshillit të Lartë të Prokurorisë, u rikthye sërish si prokuror i Krimeve të Rënda.

Hajdarmataj ka udhëhequr një sërë çështjesh të nxehta, mes tyre atë për ish-ministrin e Brendshëm Saimir Tahiri. Ishte Hajdarmataj, prokurori që firmosi kërkesën për heqjen e mandatit për Tahirin.

Mes çështjeve të nxehta të hetuara prej tij, ishte dhe ajo e italianit Guido Guidi, i cili u rrëzua me avionin e tij në zonën e Ishmit