Ish-Kryeministri britanik para komisionit hetimor: E dhimbshme të jesh këtu!

Ish-Kryeministri britanik, David Cameron, tha sot se është e dhimbshme që është nën hetim nga parlamenti për shkak të kolapsit të kompanisë Greensill Capital, ku ai ishte këshilltar dhe lobist.

“Të kthehesh në këto rethana në vendin të cilin e dua dhe e respektoj aq shumë, është e dhimbshme,” tha Ish-Kryeministri në fjalën e tij hyrëse para Komisionit për buxhet të Dhomës së Ulët të parlamentit britanik.

“Lobimi në vete është pjesë e domosdoshme dhe e shëndoshë e procesit tonë demokratik, por e pranoj se ekziston argumenti i fuqishëm se angazhimi i Ish-Kryeministrit në çfarëdo lloj interesi komercial, pavarësisht motiveve dhe qëllimeve, mund të keqinterpretohet,” tha Cameron duke sqaruar se nuk ishte i punësuar në Greensill si lobist, por kjo situatë ndryshoi në fillim të pandemisë COVID-19, raporton Agjencia e lajmeve Reuters. 

Refuzoi të thotë se sa e ka paguar kjo kompani por tha se kishte “një interes të madh ekonomik” në të ardhmen. 

“Më është paguar shuma vjetore, shumë bujare vjetore, shumë më shumë se sa fitoja si kryeministër.”

Ndryshe, Cameron në vitin 2020 për katër muaj ka kontaktuar ministra nga qeveria britanike për të lobuar për kompaninë tashmë të rrënuar financiare Greensill Capital, dëshmojnë dokumentat e publikuar ditën e martë. 

Cameron ka lobuar që Greensill, të cilin në vitin 2011 e ka financuar bankieri australian, Lex Greensill, të ketë akses në programin e qeverisë britanike për mbështetje për shkak të pandemisë COVID-19. 

Në kohën e lobimit, tha David Cameron, nuk e dinte se Greensill Capital ishte në vështirësi financiare. 

Ish-Kryeministri britanik nga viti 2010 deri në vitin 2016 dha dorëheqje pasi shtetasit e Britanisë së Madhe papritur vendosën të dalin nga Bashkimi Europian në referendumin që ai vetë e shpalli.