Ish-Kryeministri i Kosovës, Bujar Bukoshi, përcillet për në banesën e fundit
Sot është përcjellë për në banesën e fundit trupi i pajetë i Ish-Kryeministrit të Kosovës, Bujar Bukoshi.
Pas mbledhjes përkujtimore dhe homazheve në Kuvendin e Kosovës, ceremonia mortore u mbajt në Kompleksin e Dëshmorëve në Velani ku i pranishëm ishte edhe Kryeministri në detyrë Albin Kurti, i cili në fjalën e rastit e vlerësoi Dr,Bukoshin si Kryeministër të jashtëzakonshëm.
“Bujari ishte në Kosovë edhe nëse nuk ishte në Kosovë. Ishte kryeministër i jashtëzakonshëm, sepse kohërat ishin të tilla, sepse edhe personaliteti ishte i tillë. Ishte kryeministër i një populli pa ushtri, por me mijëra vullnetarë të gatshëm për luftën çlirimtare. Doktor Bujari ka lënë mbresat më të mira popullit të Kosovës edhe me shërbimin e tij si mjek, por edhe si udhëheqës, si kryeministër.
Nga një karrierë akademike hoqi dorë për t’i shërbyer popullit të Kosovës. Ai e kishte një detyrë të vështirë, sepse ishte udha lidhëse midis rezistencës paqësore dhe asaj të armatosur. Personalisht e kam takuar për herë të parë në moshën time 10 vjeçare atëherë kur prindërit e mi patën organizuar një ndejë për mjekët që kishin përfunduar me sukses operimin e babait tim pas shpërthimit të idhzës”.
“Nuk e harroj admirimin e prindërve të mi ndaj doktorit. Jam takuar edhe më 21 janar 1999 në Bruksel. Me veturën e tij kishe ardhur për të na mbështetur. Bujar Bukoshi kontribuoj, sepse punoj që ne sot e kemi lirinë dhe shtetin që e gëzojmë,” tha Kryeministri në detyrë, Albin Kurti.
Ndryshe, Ish-Kryeministri, Bujar Bukoshi, u nda nga jeta mëngjesin e së martës në moshën 78 vjeçare, pas luftës shumë të gjatë me një sëmundje të rëndë.
Gjatë karrierës së tij politike, Bujar Bukoshi ka udhëhequr Qeverinë e Kosovës në ekzil gjatë viteve 1991-1999, ndërsa pas luftës ishte deputet, ministër i Shëndetësisë dhe Zv/Kryeministër i Kosovës.
Bashkëshortja, Dr.Zana Bukoshi, ngeli pa bashkëshortin, vajzat Ora, Shota, Nita, pa babain, nipërit Dardani dhe Taulanti, pa gjyshin e çmuar, ndërsa, Kosova, pa njërin ndër themeluesit e shtetit të pavarur dhe sovran.
