Ish-Ministri i Shëndetësisë, Ilir Beqja, në SPAK

Pas Ish-Zv.ministrit Klodian Rjepaj dhe anëtarët e koncesionit të sterilizimit, sot në Prokurorinë e Posaçme, SPAK, është paraqitur Ish-Ministri i Shëndetësisë, Ilir Beqja.

Pasi për koncesionin e sterilizimit u mor dy herë në pyetje Ish-Zv.ministri Klodian Rjepaj dhe anëtarët e koncesionit, sot është hera e parë që ish-ministri Beqja, aktualisht deputet i PS pyetet nga SPAK.

Ndryshe, koncesioni i sterilizimit është në hetim prej 3 vitesh. Gjatë kohës sa Ilir Beqja drejtoi Ministrinë e Shëndetësisë, ajo dha me koncesion shërbimin e sterilizimit. Ky koncesion prej 100 mln eurosh është fituar nga “Sani Service” e biznesmenit Ilir Rrapaj, i cili sipas të dhënave rezulton mik i Beqjes.

Kjo kontratë financohet tërësisht me fonde publike, sipas metodës (pay x use) në varësi të numrit të pacientëve, të cilët do të duhet të marrin shërbimin. Për shkak se në këtë lloj shërbimi nuk mund të parashikohet me saktësi risku i kërkesës, pesha specifike e llojit të ndërhyrjeve komplekse të përdorura, sqaroi Ministria e Financave.

Për shkak të tejkalimit të pagesave të parashikuara gjatë vitit 2019, për këtë kontratë koncesioni u materializua risku i rinegocimit, proces i cili u finalizua në vitin 2020. Palët ranë dakord se për të gjitha ndërhyrjet kirurgjikale dhe obstetri-gjinekologji të kryera në strukturat spitalore që do të tejkalojnë kufirin e 63,000 ndërhyrjeve në vit, do të aplikohet një zbritje e barabartë me 25% të çmimit.