Ish-Presidenti i Dinamos dënohet me 6.5 vjet burg, ja akuzat

Ish-presidenti i Dinamos së Zagrebit, Zdravko Mamiç, i vëllai, Zoran Mamiç, si dhe drejtori sportiv, Damir Vrbanoviç dhe zyrtari i autoritetit fiskal të Kroacisë, Milan Pernar, janë shpallur fajtorë ditën e sotme për vjedhjen e 116 milionë kunave nga klubi, ose thënë ndryshe, rreth 16 mln euro, duke shkaktuar kështu edhe një dëm prej 1.6 milionë eurove në buxhetin e shtetit.

Të katërt këta persona janë dënuar me burgim. Mamiç personalisht është dënuar me 6 vite e gjysmë burgim. Milan Pernar dhe Zoran Mamiç u shpallën të pafajshëm për një nga akuzat, por rezultuan fajtorë për rolin e uljes së detyrimeve fiskale të Mamiçit, apo për marrje e dhënie ryshfeti.

Tre ish-zyrtarët e Dinamos së Zagrebit, janë fajësuar edhe për vjedhje të parave nga transferimi i Dejan Lovren, ndërsa Zdravko Mamiç ka vjedhur para edhe nga transferimi i Luka Modriç.

Për këto akuza, Pernar është dënuar me 4 vite e dy muaj; Zoran për 4 vite e 11 muaj, ndërsa Vrbanoviç me 3 vite burgim. Asnjë prej të pandehurve nuk ishin të pranishëm në gjykatë kur u dha vendimi. Por, ajo që bën çudi është se Zdravko Mamiç njoftoi ditën e djeshme, një ditë para marrjes së vendimit, se ndodhej në Medjugorje të Bosnje-Hercegovinës, edhe pse deklaroi se nuk po iu shmangej autoriteteve.