Ish-Presidenti Sali Berisha padit Sekretarin Amerikan të Shtetit për shpifje
Pasi e shpalli NON GRATA për akte korrupsioni që minojnë demokracinë në Shqipëri, sot Ish-Presidenti i Shqipërisë, Sali Berisha, bëri të ditur se ka padit Sekretarin Amerikan të Shtetit, Antony Blinken, për shpifje.
Ish-Presidenti Sali Berisha saktësoi se ka udhëzuar avokatin e tij në Francë që të ngrejë padi në Gjykatën e Parisit ndaj Sekretarit Blinken për shpifje publike.
“Jam këtu për t’iu informuar për një vendim të pazakontë. Për arsye që janë tërësisht të pa njohura për mua, Sekretari Amerikan i Shtetit ka publikuar dje në mënyrën më të papritur, më shpifëse vendimin. Dua të theksoj se që kur kam filluar jetën time politike, por ju garantoj se që kur kam prekur rrogën e parë në borderonë e shtetit, e deri dje, nuk ka njeri në botë që mund të thotë se unë jam apo kam qenë i implikuar në një aferë të çfarëdoshme korruptive. Prandaj dhe unë kam udhëzuar avokatin tim në një vend neutral dhe të respektuar, siç është Franca, që të ngrejë ndaj z. Blinken një padi direkte për shpifje publike nga Gjykata e Parisit,” tha Sali Berisha duke paralajmëruar betejën për dinjitet.
Për të gjithë ata që menduan se mbaruan punë me Sali Berishën dhe sot ai do të ik, ai e bëri të qartë se se nuk do ta dorëzojë mandatin e deputetit, por as nuk do ta përfshijë Partinë Demokratike në këtë çështje. Thjeshtë, beteja e tij në Francë ndaj diplomatit më të fuqishëm në botë, tha Berisha, do të bëhet për nder e dinjitet.
“Beteja ime ka lidhje vetëm me dinjitetin njerëzor, nuk kam unë asnjë lloj shqetësimi tjetër, por kjo është e parevokueshme. Do të mjaftonte një fakt, që unë të merrja vendime krejt të tjera. Por kishin zero fakte. Por prapë nuk humbas, do të bëj çdo përpjekje që të paraqiten në gjykatë provat ndaj meje. Do pranoja çdo provë, por jo prova të montuara në Tiranë nga zyrat e Edi Ramës. Provat le t’i nxjerrin. Tani unë kam hap gjyq, le t’i paraqesin para gjykatësit provat,” tha Ish-Presidenti Sali Berisha duke përfunduar:
“Ai është diplomati më i fuqishëm i botës, unë jam një qytetar, por që besimin te drejtësia e kam të pakufishëm”, shtoi ish-kryeministri shqiptar.”
Ndryshe, dje Ish-Presidenti i Shqipërisë, Sali Berisha, u shpall NON GRATA nga Sekretari amerikan i Shtetit, Antony Blinken.
“Akte korrupsioni të ish-Presidentit të Shqipërisë, Sali Berisha, minojnë demokracinë në Shqipëri. Unë shpall publikisht Sali Berishën dhe anëtarët e familjes së tij si të papërshtatshëm për hyrjen në Shtetet e Bashkuara,” tha Sekretari amerikan i Shtetit, Antony Blinken, përmes rrjetit social Twitter duke përfunduar:
“Ne mbetemi bashkë kundër korrupsionit me partnerët tanë në Shqipëri.”
