Itali, policia nuk e rikthei Moisi Habilajn në burg, u arratis!

Pas vendimit të Gjykatës së Apelit të Katanias, policia shkoi për t’a rikthyer në burg, por Moisi Habilaj ishte arratisur!

Lajmin e bënë të ditur BW duke shtuar se prej majit të vitit të kaluar Habilaj ishte në arrest shtëpie, por në dhjetor 2020 Apeli i Katanias konfirmoi dënimin e Shkallës së Parë me 15 vite e 5 muaj dhe 5 ditë burg.

Grupi kriminal në të cilin bënte pjesë Habilaj operonte mes Shqipërisë e Siçilisë, për trafik kryesisht droge por edhe armësh luftarake.

Në këtë çështje u implikua edhe ish-ministri i Brendshëm, Saimir Tahiri, që është kushëri me Habilajt, por ndryshe nga ta Tahiri llogaritë e hapura i ka vetëm me drejtësinë shqiptare.

Si bazë e vëllezërve Habilaj, Moisi, Artan dhe Florian ishte pikërisht fshati Babicë në Vlorë, ku u kap një sasi e madhe droge prej 3.9 ton kanabis në vitin 2017.

Tashmë Moisi Habilaj pritet të shpallet në kërkim nga Italia dhe të vuajë vitet e dënimit me burg të caktuar nga Apeli i Katanias.