Izrael, mos hidhni  bomba! Trump: Ktheni pilotët në shtëpi, është shkelje e madhe!

“Izrael. Mos hidhni  bomba. Nëse e bëni, është shkelje e madhe. Ktheni pilotët në shtëpi, tani!”, shprehet Presidenti i Shteteve të Bashkuara, Donald Trump përmes rrjetit social Truth duke reaguar pas vendimit të Izraelit për hakmarrje, pasi që sipas ushtrisë izraelite ishte kapur një raketë e lëshuar nga Irani, informacion të cilin Teherani e mohoi.

Para këtij reagimi, President Trump përpara nisjes drejt Samitit të NATO-s në Holandë, kritikoi të dyja palët për shkeljen e marrëveshjes, duke folur me tone të ashpra ndaj Izraelit,  të cilin e akuzoi se ka vepruar në mënyrë agresive sapo u njoftua marrëveshja.

“Kemi dy vende që kanë luftuar për kaq gjatë dhe kaq fort, sa nuk dinë më çfarë dreqin po bëjnë,” u shpreh Trump, duke akuzuar të dyja palët për shkelje të armëpushimit që ai kishte njoftuar mbrëmjen e kaluar ndërsa tha se personalisht nuk e konsideron zyrtarisht të prishur marrëveshjen e armëpushimit, por shprehu pakënaqësi të thellë ndaj veprimeve të Izraelit.

“Izraeli, sapo arritëm marrëveshjen, doli dhe hodhi një ngarkesë bombash siç nuk kam parë ndonjëherë. Ishte ngarkesa më e madhe që kemi parë ndonjëherë,” tha Presidenti Trump i zemëruar duke përfunduar:

“Nuk jam i kënaqur me Izraelin. Kur unë them ‘tani keni 12 orë’, nuk do të thotë që dilni në orën e parë dhe i hidhni të gjitha bombat që keni. Nuk jam i kënaqur me ta. Nuk jam i kënaqur as me Iranin.”

Reagimi vjen pasi mëngjesin e sotëm hyri në fuqi marrëveshja për armëpushim midis Izraelit dhe Iranit, e ndërmjetësuar nga Shtetet e Bashkuara.

Izraeli tha se kishte rënë dakord me propozimin, ndërsa Irani tha se do të ndalonte sulmet nëse Izraeli do të bënte të njëjtën gjë.