Izraeli e shpall NON GRATA shefin e OKB-së
Ministri i Jashtëm i Izraelit tha se ia ka ndaluar Sekretarit të Përgjithshëm të Kombeve të Bashkuara, Antonio Guterres, hyrjen në vendin e tij, sepse, siç tha, ai nuk e ka dënuar sulmin raketor të Iranit kundër Izraelit.
Irani hodhi mbrëmë më shumë se 180 raketa balistike drejt Izraelit, në përgjigje të, siç tha, agresionit të tij në Liban dhe në Gazë, raporton RFE.
Antonio Guterres lëshoi po atë ditë një deklaratë të shkurtër, duke iu referuar vetëm sulmeve të fundit në Lindjen e Mesme dhe duke dënuar përshkallëzimin e vazhdueshëm të konfliktit, gjë që asacoi Tel Avivin.
Më herët, dje, Izraeli dërgoi trupa në Libanin jugor.
Ministri i Jashtëm izraelit, Israel Katz, tha se fakti që Guterres nuk e përmendi Iranin, e bën atë person të padëshirueshëm në Izrael.
“Kushdo që nuk mund ta dënojë qartazi sulmin e urryer të Iranit kundër Izraelit, siç bënë pothuajse të gjitha vendet e botës, nuk e meriton të shkelë në tokën izraelite,” tha Katz duke shtuar:
“Izraeli do të vazhdojë t’i mbrojë qytetarët e tij dhe ta ruajë dinjitetin e tij kombëtar, me ose pa Antonio Guterresin.”
Shumica e raketave të Iranit u kapën në ajër, por disa depërtuan përmes mbrojtjes raketore. Megjithatë, nuk u raportua për viktima, raporton RFE. Kryeministri i Izraelit, Benjamin Netanyahu, tha se Irani bëri gabim të madh me sulmin raketor kundër Izraelit dhe u zotua se do të hakmerret.
